របបយោធាមីយ៉ាន់ម៉ា កាលពីថ្ងៃអាទិត្យ (ទី១៥ ខែកុម្ភៈ ឆ្នាំ២០២៦) បានប្រកាសបណ្តេញតំណាងជាន់ខ្ពស់របស់ទីម័រខាងកើត ឬទីម័រឡេស្តេ នៅក្នុងប្រទេស បន្ទាប់ពីក្រុមសិទ្ធិមនុស្សមួយ បានលើកឡើងថា ទីក្រុងឌីលី (Dili) បានបើកសំណុំរឿងផ្លូវច្បាប់ប្រឆាំងនឹងយោធា ពាក់ព័ន្ធនឹងបទឧក្រិដ្ឋកម្មសង្គ្រាម។

យោធា ដែលបានដណ្ដើមអំណាចក្នុងរដ្ឋប្រហារឆ្នាំ២០២១ ត្រូវបានចោទប្រកាន់អស់រយៈពេលជាច្រើនទសវត្សរ៍មកហើយ ពីបទរំលោភសិទ្ធិ ដែលភាគច្រើនផ្តោតលើជនជាតិភាគតិចរបស់ប្រទេសនេះ។

បច្ចុប្បន្ន សហភាពមីយ៉ាន់ម៉ា កំពុងការពារខ្លួនក្នុងសំណុំរឿង នៅតុលាការយុត្តិធម៌អន្តរជាតិ (ICJ) ជុំវិញការចោទប្រកាន់ពីបទប្រល័យពូជសាសន៍ប្រឆាំងនឹងជនជាតិភាគតិចរ៉ូហ៊ីងយ៉ា ដែលភាគច្រើនជាមូស្លីម។

ប៉ុន្តែអង្គការសិទ្ធិមនុស្ស Chin (CHRO) បានឲ្យដឹងកាលពីខែកុម្ភៈថា ទីម័រខាងកើតបានបើកដំណើរសំណុំរឿងផ្ទាល់ខ្លួន ប្រឆាំងនឹងរបបយោធា ទាំងបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងនឹងមនុស្សជាតិ។ CHRO ដែលតំណាងឲ្យជនជាតិភាគតិច Chin នៅមីយ៉ាន់ម៉ា បានបញ្ជាក់ថា «រដ្ឋអាជ្ញាជាន់ខ្ពស់ទីម័រខាងកើត ត្រូវបានតែងតាំងឲ្យពិនិត្យមើលឯកសារព្រហ្មទណ្ឌ» ដែលបង្ហាញដោយអង្គការនេះ។

សេចក្តីថ្លែងការណ៍របស់របបយោធា បានឲ្យដឹងថា ការរាយការណ៍ពីការតែងតាំងរដ្ឋអាជ្ញារបស់ទីក្រុងឌីលី ដើម្បីស៊ើបអង្កេតករណីនេះ គឺជា «រឿងគួរឲ្យខកចិត្តយ៉ាងខ្លាំង»។ ប្រទេសនេះបានបញ្ជាក់ថា ភារធារីរបស់ទីម័រខាងកើតត្រូវបានកោះអញ្ជើញនៅថ្ងៃទី១៣ ខែកុម្ភៈ ហើយត្រូវបានផ្តល់ពេលមួយសប្តាហ៍ ដើម្បីឲ្យចាកចេញពីសហភាពមីយ៉ាន់ម៉ា៕