ប្រធានាធិបតី លោក Karol Nawrocki បាននិយាយនៅក្នុងបទសម្ភាសន៍ជាមួយទូរទស្សន៍ Polsat News ថា ប្រទេសប៉ូឡូញគួរតែពិចារណាអភិវឌ្ឍអាវុធនុយក្លេអ៊ែរផ្ទាល់ខ្លួន ដោយសារការគំរាមកំហែងកាន់តែខ្លាំងពីរុស្ស៊ី។

លោក Nawrocki បានលើកឡើងនៅក្នុងបទសម្ភាសន៍នោះថា៖ «ខ្ញុំជាអ្នកគាំទ្រដ៏ធំរបស់ប្រទេសប៉ូឡូញដែលចូលរួមក្នុងគម្រោងនុយក្លេអ៊ែរ»។ លោកបានបន្ថែមថា លោកមិនអាចនិយាយបានថា តើប្រទេសប៉ូឡូញនឹងគួរចាប់ផ្តើមការងារដែលមានគោលបំណងមានអាវុធនុយក្លេអ៊ែរផ្ទាល់ខ្លួនដែរ ឬអត់នោះទេ។

លោក Nawrocki បានបញ្ជាក់ទៀតថា៖ «យើងជាប្រទេសមួយដែលនៅជាប់ព្រំដែននៃជម្លោះប្រដាប់អាវុធ ហើយយើងដឹងពីអ្វីដែលជាអាកប្បកិរិយារបស់សហព័ន្ធរុស្ស៊ីដែលជាចក្រពត្តិនិយម និងឈ្លានពាន ចំពោះប្រទេសប៉ូឡូញ»។

ការអត្ថាធិប្បាយរបស់លោក Nawrocki បានកើតឡើងបន្ទាប់ពីអធិការបតីអាល្លឺម៉ង់ លោក Friedrich Merz បាននិយាយនៅក្នុងសន្និសីទសន្តិសុខទីក្រុងមុយនិក (Munich Security Conference) ថា លោកកំពុងចរចាជាមួយបារាំង ពាក់ព័ន្ធនឹងប្រព័ន្ធការពារនុយក្លេអ៊ែរនាពេលខាងមុខរបស់អឺរ៉ុប។ លោក Merz បានធ្វើការអំពាវនាវឲ្យរៀបចំទំនាក់ទំនងឆ្លងមហាសមុទ្រអាត្លង់ទិកឡើងវិញ ក្នុងអំឡុងពេលមានភាពច្របូកច្របល់នៃអាណត្តិទី២ របស់ប្រធានាធិបតីអាមេរិក លោក Donald Trump។

តាមរយៈបទសម្ភាសន៍ជាមួយប្រព័ន្ធផ្សព្វផ្សាយ Polsat News នោះ លោក Nawrocki បានសង្កត់ធ្ងន់ថា ប្រទេសប៉ូឡូញគួរតែដើរតាមមាគ៌ាឆ្ពោះទៅរកការអភិវឌ្ឍសក្តានុពលនុយក្លេអ៊ែរផ្ទាល់ខ្លួន ដោយគោរពតាមបទប្បញ្ញត្តិអន្តរជាតិទាំងអស់៕