យ៉ាងហោចណាស់មនុស្ស ៥៩នាក់ បានបាត់បង់ជីវិត នៅពេលដែលព្យុះស៊ីក្លូន Gezani បានបក់បោកលើម៉ាដាហ្គាស្កា កាលពីសប្តាហ៍មុន។ នេះបើយោងតាមការិយាល័យគ្រប់គ្រងគ្រោះមហន្តរាយដែលបានប្រាប់ឲ្យដឹងនៅថ្ងៃចន្ទ (ទី១៦ ខែកុម្ភៈ ឆ្នាំ២០២៦) នេះ ខណៈដែលស្ថាប័ននេះវាយតម្លៃពីផលប៉ះពាល់នៃព្យុះត្រូពិកទី២ ដែលបានវាយប្រហារប្រទេសកោះមហាសមុទ្រឥណ្ឌាមួយនេះ នៅឆ្នាំនេះ។

ការិយាល័យជាតិ សម្រាប់ការគ្រប់គ្រងហានិភ័យ និងគ្រោះមហន្តរាយ (BNGRC) បានបញ្ជាក់ឲ្យដឹងថា ព្យុះស៊ីក្លូននេះ បានបង្ខំឲ្យអ្នកស្រុក ១៦.៤២៨នាក់បម្លាស់ទីលំនៅ ខណៈដែលមនុស្ស ១៥នាក់ នៅតែបាត់ខ្លួន ៨០៤នាក់រងរបួស ហើយ ៤២៣.៩៨៦នាក់ ត្រូវបានចាត់ថ្នាក់ថា រងផលប៉ះពាល់ដោយគ្រោះមហន្តរាយនេះ។

យោងតាមការិយាល័យមនុស្សធម៌របស់អង្គការសហប្រជាជាតិ (UN) ព្យុះ Gezani បានបោកបក់កាត់ប្រទេសនេះ ត្រឹមតែ ១០ថ្ងៃប៉ុណ្ណោះបន្ទាប់ពីព្យុះស៊ីក្លូន Fytia បានបណ្ដាលឲ្យមនុស្ស ១៤នាក់ស្លាប់ និងបានបង្ខំឲ្យជាង ៣១.០០០នាក់ផ្លាស់ទីលំនៅ។

អំឡុងខ្យល់បក់ខ្លាំងបំផុត ព្យុះ Gezani មានល្បឿនប្រហែល ១៨៥គីឡូម៉ែត្រ ក្នុងមួយម៉ោង ដោយកម្លាំងខ្យល់បក់កើនឡើងដល់ជិត ២៧០គីឡូម៉ែត្រក្នុងមួយម៉ោង ពោលគឺខ្លាំងគ្រប់គ្រាន់ធ្វើឲ្យបន្ទះដែកដំបូលផ្ទះរហែកដាច់ពីគ្នា និងរំលើងដើមឈើធំៗទាំងឫស។

ទីភ្នាក់ងារអាកាសធាតុរបស់ប្រទេសនេះបានឲ្យដឹងនៅក្នុងសេចក្តីថ្លែងការណ៍មួយថា ព្យុះស៊ីក្លូននេះបានធ្វើបក់បោកតម្រង់ឆ្ពោះទៅទិសខាងលិចឆ្លងកាត់ច្រកសមុទ្រម៉ូសំប៊ិក ដោយនាំឲ្យមានខ្យល់បក់ខ្លាំង និងរលកកម្ពស់រហូតដល់ ១០ម៉ែត្រនៅចុងភាគខាងត្បូងនៃប្រទេសម៉ូសំប៊ិក។

ចាប់តាំងពីពេលនោះមក ប្រព័ន្ធអាកាសធាតុនេះបានបក់ប្ដូរទិសវិលត្រឡប់ទៅទិសខាងកើតលើច្រកសមុទ្រនេះវិញ ហើយការព្យាករបង្ហាញថា វានឹងឆ្ពោះទៅម៉ាដាហ្គាស្ការម្តងទៀត ដោយមានការរំពឹងទុកថា នឹងបក់ទៅដល់ដីគោកលើកទី២ នៅភាគនិរតីនៃប្រទេសម៉ាដាហ្គាស្ការ នាថ្ងៃចន្ទ៕