លោកប្រធានាធិបតីអាមេរិក Donald Trump ប្តេជ្ញាចិត្ត ចំពោះភាពជោគជ័យរបស់នាយករដ្ឋមន្ត្រីហុងគ្រី លោក Viktor Orban ពីព្រោះភាពជាអ្នកដឹកនាំរបស់លោក គឺមានសារៈសំខាន់ សម្រាប់ផលប្រយោជន៍ជាតិអាមេរិក។ នេះបើយោងតាមរដ្ឋមន្ត្រីការបរទេសអាមេរិក លោក Marco Rubio ដែលបាននិយាយកាលពីថ្ងៃទី១៦ ខែកុម្ភៈ ឆ្នាំ២០២៦)។

ការកត់សម្គាល់របស់លោក Rubio បានផ្តល់ការគាំទ្រយ៉ាងខ្លាំងពីសហរដ្ឋអាមេរិក ចំពោះមេដឹកនាំជាតិនិយមដ៏យូរអង្វែងដែលកំពុងប្រឈមនឹងការបោះឆ្នោតនៅខែមេសា។

អំឡុងពេលនិយាយនៅឯសន្និសីទសារព័ត៌មានរួមគ្នាជាមួយលោក Orban នៅទីក្រុង Budapest លោក Rubio បានបញ្ជាក់ថា ទំនាក់ទំនងរបស់សហរដ្ឋអាមេរិកជាមួយហុងគ្រី កំពុងចូលទៅក្នុង «យុគសម័យមាស» ប៉ុន្តែនេះហាក់ដូចជាធ្វើឲ្យរឿងនោះឲ្យក្លាយជាលក្ខខណ្ឌ ជុំវិញការបន្តភាពជាអ្នកដឹកនាំរបស់លោក Orban។

ដោយឈរក្បែរលោក Orban លោក Rubio បាននិយាយថា៖ «លោកប្រធានាធិបតី Trump ប្តេជ្ញាចិត្តយ៉ាងខ្លាំង ចំពោះភាពជោគជ័យរបស់អ្នក ពីព្រោះភាពជោគជ័យរបស់អ្នក គឺជាភាពជោគជ័យរបស់យើង។ យើងចង់ឲ្យប្រទេសនេះទទួលបានជោគជ័យ។ វាស្ថិតនៅក្នុងផលប្រយោជន៍ជាតិរបស់យើង ជាពិសេសដរាបណាអ្នកនៅតែជានាយករដ្ឋមន្ត្រី និងជាមេដឹកនាំនៃប្រទេសនេះ»។

គួរបញ្ជាក់ថា លោក Rubio ដែលក៏បម្រើការជាទីប្រឹក្សាសន្តិសុខជាតិរបស់លោក Trump ផងដែរនោះ បានធ្វើដំណើរជើងទី២ នៃដំណើរទស្សនកិច្ចរយៈពេល ២ថ្ងៃ នៅអឺរ៉ុបកណ្តាល ដោយបានទៅទស្សនកិច្ចនៅស្លូវ៉ាគី និងហុងគ្រី ដែលមេដឹកនាំអភិរក្សនិយមរបស់ប្រទេសទាំង២ មានទំនាក់ទំនងជិតស្និទ្ធិជាមួយលោក Trump និងរិះគន់សហភាពអឺរ៉ុប៕