ប្រធានាធិបតីអាមេរិក លោក Donald Trump បាននិយាយកាលពីថ្ងៃចន្ទ (១៦ កុម្ភៈ) ថា រូបលោកនឹងចូលរួម «ដោយប្រយោល» ក្នុងកិច្ចចរចារវាងអ៊ីរ៉ង់ និងសហរដ្ឋអាមេរិក ស្តីពីកម្មវិធីនុយក្លេអ៊ែររបស់ទីក្រុងតេអេរ៉ង់ ដែលនឹងចាប់ផ្តើមនៅថ្ងៃអង្គារ ទី១៧ ខែកុម្ភៈ នេះនៅទីក្រុងហ្សឺណែវ ដោយបន្ថែមថា លោកជឿថាទីក្រុងតេអេរ៉ង់ ចង់ធ្វើកិច្ចព្រមព្រៀងមួយ ព្រោះពួកគេមិនចង់បាន «ផលវិបាក» នោះទេ។

ថ្លែងប្រាប់អ្នកយកព័ត៌មានលើយន្តហោះ Air Force One លោក Trump បាននិយាយថា «លោកនឹងចូលរួមក្នុងកិច្ចពិភាក្សាទាំងនោះ ដោយប្រយោល ហើយកិច្ចពិភាក្សានឹងមានសារៈសំខាន់ខ្លាំងណាស់»។ នៅពេលត្រូវបានសាកសួរពីការរំពឹងទុកសម្រាប់កិច្ចព្រមព្រៀងមួយ លោក Trump និយាយថា អ៊ីរ៉ង់ចង់បានកិច្ចចរចាដែលប្រកាន់ជំហរតឹង ប៉ុន្តែពួកគេបានរៀនមេរៀនពីផលវិបាកនៃជំហរដ៏តឹងរ៉ឹងបែបនេះកាលពីរដូវក្តៅមុន ពោលគឺនៅពេលអាមេរិក ទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។

លោក Trump បានបន្តថា នៅពេលនេះ ភាគីអ៊ីរ៉ង់មានការជំរុញទឹកចិត្តក្នុងកិច្ចចរចា ហើយលោកគិតថា «ពួកគេមិនចង់បានផលវិបាកនៃការមិនធ្វើកិច្ចព្រមព្រៀងនោះទេ»។ ការព្រមានជាថ្មីពីប្រធានាធីបតីអាមេរិករូបនេះ បានកើតឡើងស្របពេលភាពតានតឹងកំពុងខ្ពស់ខ្លាំង នៅមុនពេលកិច្ចចរចា ដោយសហរដ្ឋអាមេរិក បានដាក់ពង្រាយនាវាផ្ទុកយន្តហោះគ្រឿងទីពីរទៅកាន់មជ្ឈិមបូព៌ា។ ក្រុមមន្ត្រីអាមេរិកបានប្រាប់សារព័ត៌មានរ៉យទ័រថា យោធាអាមេរិកកំពុងត្រៀមលក្ខណៈសម្រាប់លទ្ធភាពនៃយុទ្ធនាការយោធាជាបន្តបន្ទាប់ ប្រសិនបើការចរចាមិនទទួលបានជោគជ័យ។

នៅមុនពេលដែលសហរដ្ឋអាមេរិក បានចូលរួមជាមួយអ៊ីស្រាអែល ក្នុងការវាយប្រហារទីតាំងនុយក្លេអ៊ែរអ៊ីរ៉ង់នៅក្នុងខែមិថុនា ឆ្នាំមុន កិច្ចចរចានុយក្លេអ៊ែរអ៊ីរ៉ង់-សហរដ្ឋអាមេរិក បានជាប់គាំង ដោយសារតែការទាមទាររបស់ទីក្រុងវ៉ាស៊ីនតោន ដែលថា ទីក្រុងតេអេរ៉ង់គួរតែបោះបង់ការចម្រាញ់សារធាតុអ៊ុយរ៉ានីញ៉ូមនៅលើទឹកដីរបស់ខ្លួន ដែលសហរដ្ឋអាមេរិក ចាត់ទុកថាជាផ្លូវឆ្ពោះទៅរកអាវុធនុយក្លេអ៊ែរអ៊ីរ៉ង់៕