តំណាងអ៊ុយក្រែន និងរុស្ស៊ី នឹងជួបប្រជុំគ្នានៅទីក្រុងហ្សឺណែវ រយៈពេលពីរថ្ងៃគឺនៅថ្ងៃអង្គារ ទី១៧ ខែកុម្ភៈ នេះនិងនៅថ្ងៃពុធ ទី១៨ ខែកុម្ភៈ សម្រាប់កិច្ចចរចាសន្តិភាពដែលសម្របសម្រួលដោយសហរដ្ឋអាមេរិកជុំថ្មីមួយទៀត ដែលវិមានក្រឹមឡាំង បាននិយាយកាលពីថ្ងៃចន្ទថា ទំនងជាផ្តោតលើបញ្ហាដីធ្លី ដែលជាចំណុចជាប់គាំងចម្បងបំផុតក្នុងកិច្ចពិភាក្សាកន្លងមក។

ប្រធានាធិបតីអាមេរិក លោក Donald Trump កំពុងដាក់សម្ពាធលើទាំងទីក្រុងមូស្គូ និងទីក្រុងគីវ ឱ្យឈានដល់កិច្ចព្រមព្រៀងមួយដើម្បីបញ្ចប់សង្គ្រាមដ៏ធំបំផុតរបស់អឺរ៉ុប ចាប់តាំងពីឆ្នាំ១៩៤៥ មកមិនធ្លាប់ធ្លាប់មាន ប៉ុន្តែលោកប្រធានាធិបតីអ៊ុយក្រែន Volodymyr Zelenskyy បានត្អូញត្អែរថា ទីក្រុងគីវកំពុងប្រឈមមុខនឹងសម្ពាធខ្លាំងជាងគេដើម្បីឱ្យធ្វើសម្បទាន។

រុស្ស៊ីទាមទារឱ្យអ៊ុយក្រែនប្រគល់ដី ២០% ដែលសេសសល់ នៅភាគខាងកើតនៃតំបន់ Donetsk ពោលគឺទឹកដីដែលទីក្រុងមូស្គូ បានបរាជ័យក្នុងការដណ្តើមយក ប៉ុន្តែទីក្រុងគីវ ក៏តែងបដិសេធមិនព្រមលះបង់ដាច់ខាត។ គួរឱ្យដឹងថា រុស្ស៊ីកាន់កាប់ប្រហែល ២០% នៃទឹកដីជាតិទាំងមូលរបស់អ៊ុយក្រែន រួមទាំងតំបន់គ្រីម៉េ និងផ្នែកខ្លះនៃតំបន់ដុនបាសភាគខាងកើត ដែលត្រូវបានរឹបអូស មុនជម្លោះឆ្នាំ២០២២។

អ្នកនាំពាក្យវិមានក្រឹមឡាំង លោក Dmitry Peskov ប្រាប់អ្នកយកព័ត៌មានថា «លើកនេះ គោលគំនិតគឺដើម្បីពិភាក្សាអំពីបញ្ហាជាច្រើនប្រភេទ រួមទាំងបញ្ហាសំខាន់ៗផងដែរ។ បញ្ហាសំខាន់ៗនោះគឺទាក់ទងនឹងរឿងទឹកដី និងអ្វីៗផ្សេងទៀតដែលពាក់ព័ន្ធនឹងការទាមទារដែលរុស្ស៊ីបានដាក់ចេញ»។

ទីកន្លែងសម្រាប់កិច្ចពិភាក្សាជុំថ្មីនេះ ត្រូវបានប្តូរទៅប្រទេសស្វីស បន្ទាប់ពីទីក្រុងអាប៊ូដាប៊ី បានធ្វើជាម្ចាស់ផ្ទះនៃកិច្ចចរចាពីរជុំកាលពីមុន ដែលភាគីទាំងពីរពណ៌នាថាមានលក្ខណៈស្ថាបនា ប៉ុន្តែមិនសម្រេចបានវឌ្ឍនភាពធំដុំណាមួយឡើយ។ ជំនួបជុំថ្មីនៅទីក្រុងហ្សឺណែវ កើតឡើងប៉ុន្មានថ្ងៃប៉ុណ្ណោះមុនខួបលើកទីបួន គឺនៅថ្ងៃទី២៤ ខែកុម្ភៈ នៃប្រតិបត្តិការយោធាទ្រង់ទ្រាយធំរបស់រុស្ស៊ី លើអ៊ុយក្រែន៕