លោកប្រធានាធិបតី Volodymyr Zelenskyy បាននិយាយកាលពីថ្ងៃ១៦ កុម្ភៈថា រុស្ស៊ីកំពុងត្រៀមវាយប្រហារទ្រង់ទ្រាយធំថ្មីលើហេដ្ឋារចនាសម្ព័ន្ធថាមពលរបស់អ៊ុយក្រែន ខណៈក្រុមចរចារបស់ទីក្រុងគីវបានទៅដល់ទីក្រុងហ្សឺណែវ ប្រទេសស្វីស សម្រាប់កិច្ចចរចាសន្តិភាពជុំមួយទៀតជាមួយសហរដ្ឋអាមេរិក និងរុស្ស៊ី នៅថ្ងៃអង្គារ និងថ្ងៃពុធ សប្ដាហ៍នេះ។

លោក Zelenskyy បាននិយាយនៅក្នុងសុន្ទរកថាពេលយប់របស់លោកថា របាយការណ៍ចារកម្ម បង្ហាញថារុស្ស៊ីកំពុងត្រៀមវាយប្រហារទ្រង់ទ្រាយធំថ្មីលើថាមពល ហើយប្រព័ន្ធការពារដែនអាកាសត្រូវតែត្រៀមឱ្យបានត្រឹមត្រូវ។

លោកបានជំរុញឱ្យបណ្ដាដៃគូធានាការផ្តល់ការគាំទ្រប្រព័ន្ធការពារដែនអាកាសទាន់ពេលវេលា ដោយនិយាយថា ការពន្យារពេលអាចបង្កើនការខូចខាតពីការវាយប្រហារនានា។

លោកថា ការពន្យារពេលណាមួយក្នុងការផ្គត់ផ្គង់មីស៊ីលការពារដែនអាកាស ហើយការដឹកជញ្ជូនមិនទាន់ពេលវេលាណាមួយ នឹងបង្កើនការខូចខាតពីការវាយប្រហារកាន់តែធ្ងន់ធ្ងរ ដោយបន្ថែមថា ការប្តេជ្ញាចិត្តដែលបានពិភាក្សាក្នុងសន្និសីទសន្តិសុខទីក្រុងមុយនិចថ្មីៗនេះគួរតែត្រូវបានអនុវត្តយ៉ាងឆាប់រហ័ស។

លោក Zelenskyy បាននិយាយថា គណៈប្រតិភូរបស់លោកបានទៅដល់ទីក្រុងហ្សឺណែវ ហើយកំពុងរៀបចំសម្រាប់ការចរចា ប៉ុន្តែបានព្រមានថា ការវាយប្រហាររបស់រុស្ស៊ីជាបន្តបន្ទាប់អាចធ្វើឱ្យវឌ្ឍនភាពឈានឆ្ពោះទៅរកសន្តិភាពកាន់តែលំបាក៕