ក្រសួងការបរទេសសហព័ន្ធស្វីសបាននិយាយកាលពីល្ងាចថ្ងៃចន្ទ ១៦កុម្ភៈសប្ដាហ៍នេះថា កិច្ចចរចាជុំថ្មីនាពេលខាងមុខរវាងរុស្ស៊ី សហរដ្ឋអាមេរិក និងអ៊ុយក្រែន ដែលគ្រោងនឹងចាប់ផ្តើមនៅថ្ងៃទី១៧ កុម្ភៈ នៅទីក្រុងហ្សឺណែវ ប្រទេសស្វីស នឹងត្រូវធ្វើឡើងដោយសម្ងាត់។

ក្រសួងការបរទេសស្វីសបាននិយាយក្នុងសេចក្តីថ្លែងការណ៍មួយថា តំណាងសារព័ត៌មានមិនត្រូវបានអនុញ្ញាតឱ្យចូលរួមកិច្ចចរចាត្រីភាគីរវាងរុស្ស៊ី អ៊ុយក្រែន និងសហរដ្ឋអាមេរិកទេ។  

យោងតាមរបាយការណ៍មុនៗ គណៈប្រតិភូមកពីរុស្ស៊ី សហរដ្ឋអាមេរិក និងអ៊ុយក្រែន គ្រោងនឹងធ្វើកិច្ចចរចាជុំថ្មី ក្នុងទីក្រុងហ្សឺណែវនៅថ្ងៃទី១៧ និង១៨ ខែកុម្ភៈសប្ដាហ៍នេះ។

ប្រភពបាននិយាយថា កិច្ចចរចាត្រីភាគីត្រូវគេរំពឹងថានឹងផ្តោតលើកត្តាសំខាន់ៗក្នុងការដោះស្រាយបញ្ហាអ៊ុយក្រែន ដែលគ្របដណ្តប់លើទិដ្ឋភាពយោធា នយោបាយ និងមនុស្សធម៌។ រយៈពេលនៃកិច្ចចរចានៅតែមិនច្បាស់លាស់។ ក្នុងអំឡុងពេលកិច្ចពិភាក្សាត្រីភាគី រុស្ស៊ី និងអ៊ុយក្រែនក៏អាចមានជំនួបទ្វេភាគីផងដែរ។

ចាប់តាំងពីខែមករា ដើមឆ្នាំនេះ ក្រុមតំណាងរបស់ប្រទេសទាំងបី បានធ្វើកិច្ចចរចាពីរជុំនៅទីក្រុងអាប៊ូដាប៊ី ប្រទេសអេមីរ៉ាតអារ៉ាប់រួម៕