ភ្លៀងធ្លាក់យ៉ាងខ្លាំងបានវាយប្រហារកោះ South Island ដែលនៅភាគខាងត្បូងប្រទេសនូវែលសេឡង់ នៅថ្ងៃអង្គារ (១៧ កុម្ភៈ) នេះ បង្កឱ្យមានការព្រមានពីទឹកជំនន់ និងបង្ខំឱ្យអាជ្ញាធរបិទផ្លូវ និងស្ពាន ខណៈប្រព័ន្ធព្យុះដ៏ខ្លាំងក្លាមួយបាននាំមកនូវការបំផ្លិចបំផ្លាញយ៉ាងទូលំទូលាយក្នុងរដ្ឋធានីវែលីងតោន ចាប់តាំងពីចុងសប្តាហ៍មុនមក ហើយបានបន្តទៅវាយប្រហារនៅភាគខាងត្បូង។

ការិយាល័យអាកាសធាតុនូវែលសេឡង់ បាននិយាយថា ប្រព័ន្ធសម្ពាធទាបនៅឯឆ្នេរសមុទ្រភាគខាងកើត អាចនាំមកនូវភ្លៀងធ្លាក់ខ្លាំងបន្ថែមទៀតរហូតដល់ថ្ងៃអង្គារនេះ ដោយព្រមានថា កម្រិតទឹកទន្លេ និងអូរអាចកើនឡើងយ៉ាងឆាប់រហ័ស ហើយបំណាក់ដីដ៏គ្រោះថ្នាក់ ក៏អាចកើតឡើងផងដែរ។

រលកធំៗ និងស្ថានភាពសមុទ្រដ៏គ្រោះថ្នាក់ក៏ត្រូវបានរំពឹងទុក នេះបើយោងតាមការចុះផ្សាយរបស់ទីភ្នាក់ងារឧតុនិយមនូវែលសេឡង់។ អាជ្ញាធរបានប្រកាសដាក់ឧបទ្វីប Banks ស្ថិតក្នុងគ្រាអាសន្ន ដែលជាតំបន់នៅជិតទីក្រុង Christchurch ដ៏ធំទីពីររបស់នូវែលសេឡង់ បន្ទាប់ពីទឹកជំនន់ ដើមឈើដួលរលំ និងបំណាក់ដីបានរំខានដល់សហគមន៍ និងកាត់ផ្តាច់ទំនាក់ទំនង និងថាមពលនៅតំបន់មួយចំនួន។

រូបភាពតាមបណ្ដាញអ៊ីនធឺណិតបានបង្ហាញឱ្យឃើញផ្នែកខ្លះនៃផ្លូវថ្នល់បាក់ស្រុត ផ្លូវលិចទឹក និងកម្រិតទឹកទន្លេដែលកើនឡើងយ៉ាងលឿននៅទូទាំងតំបន់។ កាលពីថ្ងៃចន្ទ ព្យុះភ្លៀងដ៏ខ្លាំងក្លានេះបានបង្កឱ្យមានការរំខានយ៉ាងទូលំទូលាយរួចទៅហើយនៅទូទាំងតំបន់ធំៗនៃកោះ North Island ភាគខាងជើងរបស់ននូវែលសេឡង់ ជាទីដែលជើងហោះហើរត្រូវបានលុបចោល ផ្លូវហាយវេសំខាន់ៗត្រូវបានបិទ ហើយប្រជាជនរាប់ម៉ឺននាក់ពុំមានថាមពលអគ្គិសនីប្រើប្រាស់នោះទេ៕