វិមានក្រឹមឡាំង បាននិយាយកាលពីថ្ងៃចន្ទ ទី១៦ ខែកុម្ភៈ ថា អ្វីដែលខ្លួនហៅថា «បញ្ហាសំខាន់ៗ» រួមមានទាំងសំណួរដ៏រសើបអំពីបញ្ហាទឹកដី នឹងត្រូវបានពិភាក្សានៅក្នុងកិច្ចចរចាសន្តិភាពស្តីពីអ៊ុយក្រែន ដែលត្រូវធ្វើឡើងនៅទីក្រុងហ្សឺណែវ សប្តាហ៍នេះ។

កិច្ចចរចា រវាងរុស្ស៊ី អ៊ុយក្រែន និងសហរដ្ឋអាមេរិក គ្រោងនឹងធ្វើឡើងនៅថ្ងៃអង្គារនេះ និងថ្ងៃពុធ នៅពេលដែលទីក្រុងគីវកំពុងស្ថិតនៅក្រោមសម្ពាធកាន់តែខ្លាំងឡើងរបស់សហរដ្ឋអាមេរិក ដើម្បីចុះកិច្ចព្រមព្រៀងមួយ ហើយខណៈទីក្រុងមូស្គូទាមទារឱ្យអ៊ុយក្រែនប្រគល់តំបន់ Donbas ទាំងមូល។ វិមានក្រឹមឡាំង បានបញ្ជាក់ថា គណៈប្រតិភូរុស្ស៊ីនឹងត្រូវបានដឹកនាំដោយលោក Vladimir Medinsky ជំនួយការរបស់ប្រធានាធិបតី លោក Vladimir Putin។

អ្នកនាំពាក្យវិមានក្រឹមឡាំងលោក Dmitry Peskov បានប្រាប់អ្នកសារព័ត៌មានថា «លើកនេះ គំនិតនេះគឺត្រូវចរចាអំពីបញ្ហាជាច្រើនរួមទាំងបញ្ហាសំខាន់ៗ ដែលបញ្ហាសំខាន់ៗនោះទាក់ទងនឹងទឹកដី និងអ្វីៗផ្សេងទៀតដែលទាក់ទងនឹងការទាមទារដែលយើងបានដាក់ចេញ»។

លោកបាននិយាយថា ប្រមុខចារកម្មយោធា លោក Igor Kostyukov ក៏នឹងចូលរួមក្នុងកិច្ចចរចានេះផងដែរ ហើយបេសកជនពិសេសរបស់លោក Putin គឺលោក Kirill Dmitriev នឹងចូលរួមក្នុងក្រុមការងារដាច់ដោយឡែកមួយស្តីពីបញ្ហាសេដ្ឋកិច្ច។

ប្រធានាធិបតីសហរដ្ឋអាមេរិក លោក Donald Trump បាននិយាយថា លោកចង់សម្របសម្រួលបញ្ចប់ជម្លោះដែលលោកចាត់ទុកថាជា «ការបង្ហូរឈាម»គ្មានន័យ ទោះបីជារុស្ស៊ីនិងអ៊ុយក្រែននៅតែឃ្លាតឆ្ងាយគ្នាលើបញ្ហាសំខាន់ៗរួមមានបញ្ហាទឹកដីដែលគ្រប់គ្រងនៅរោងចក្រថាមពលនុយក្លេអ៊ែរ Zaporizhzhia និងតួនាទីរបស់កងទ័ពលោកខាងលិចនៅក្នុងប្រទេសអ៊ុយក្រែននៅក្រោយសង្គ្រាម ក៏ដោយ។