ក្រសួងសន្តិសុខមាតុភូមិសហរដ្ឋអាមេរិក (DHS) បានអស់ថវិកាកាលពីចុងសប្តាហ៍កន្លងទៅនេះ ដែលនាំឱ្យមានការបិទរដ្ឋាភិបាលដោយផ្នែកលើកទីបីនៃអាណត្តិទីពីររបស់លោកប្រធានាធិបតី Donald Trump ខណៈការចរចា រវាងគណបក្សសាធារណរដ្ឋ និងគណបក្សប្រជាធិបតេយ្យ នៅតែជាប់គាំង ដោយសភាកំពុងឈប់សម្រាករហូតដល់ថ្ងៃទី២៣ ខែកុម្ភៈ។

គណបក្សប្រជាធិបតេយ្យ កំពុងអំពាវនាវឱ្យមានការផ្លាស់ប្តូរប្រតិបត្តិការអន្តោប្រវេសន៍របស់ក្រសួងសន្តិសុខមាតុភូមិសហរដ្ឋអាមេរិក (DHS) បន្ទាប់ពីការបាញ់ប្រហារពីរលើកលើពលរដ្ឋអាមេរិកក្នុងទីក្រុង មីណេអាប៉ូលីស(Minneapolis) កាលពីខែមុន។ Alex Pretti និង Renee Good ត្រូវបានបាញ់សម្លាប់ដោយមន្ត្រីសហព័ន្ធមកពីអង្គភាពអនុវត្តច្បាប់អន្តោប្រវេសន៍ គយ និងល្បាតព្រំដែន ក្នុងអំឡុងពេលប្រតិបត្តិការ។ កាលពីថ្ងៃចន្ទ មន្ត្រីនៅរដ្ឋ Minnesota បាននិយាយថាទីភ្នាក់ងារFBI បានបដិសេធមិនចែករំលែកភស្តុតាងជាមួយអាជ្ញាធរអនុវត្តច្បាប់រដ្ឋនោះទេ បន្ទាប់ពីការសម្លាប់ Alex Pretti កាលពីថ្ងៃទី២៤ ខែមករា។

ក្រសួងសន្តិសុខមាតុភូមិសហរដ្ឋអាមេរិក (DHS) បានឈានចូលដល់ការបិទកាលពីថ្ងៃសៅរ៍សប្តាហ៍កន្លងទៅនេះ ប៉ុន្តែនឹងនៅបន្តប្រតិបត្តិការនានាដែលត្រូវបានចាត់ទុកថាចាំបាច់។ ការកាត់មូលនិធិនេះធ្វើឲ្យប៉ះពាល់ដល់ទីភ្នាក់ងារនានាក្រោមក្រសួងសន្តិសុខមាតុភូមិសហរដ្ឋអាមេរិក (DHS) រួមទាំងរដ្ឋបាលសន្តិសុខដឹកជញ្ជូន(TSA) ទីភ្នាក់ងារគ្រប់គ្រងគ្រោះមហន្តរាយសហព័ន្ធ(FEMA) គយនិងការពារព្រំដែន(CBP) ដែលគ្រប់គ្រងការល្បាតព្រំដែន(ICE) និងឆ្មាំល្បាតឆ្នេរសហរដ្ឋអាមេរិក។

នៅអាកាសយានដ្ឋានសហរដ្ឋអាមេរិក បុគ្គលិកចំនួន ២.៩៣៣នាក់ក្នុងចំណោម៦៤.១៣០នាក់របស់រដ្ឋបាលសន្តិសុខដឹកជញ្ជូន(TSA) ត្រូវបានផ្អាកពីការងារពេញមួយរយៈពេលនៃការបិទនេះ ហើយបុគ្គលិក ៩៥ភាគរយដែលនៅសល់នឹងនៅតែបំពេញកាតព្វកិច្ច ប៉ុន្តែនឹងធ្វើការដោយគ្មានប្រាក់ឈ្នួលរហូតដល់ ក្រសួងសន្តិសុខមាតុភូមិសហរដ្ឋអាមេរិក (DHS) ទទួលបានមូលនិធិ។