ប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) ចាប់ផ្តើមដំណើរទស្សនកិច្ចរយៈពេលបីថ្ងៃ ទៅកាន់ប្រទេសឥណ្ឌានៅថ្ងៃអង្គារនេះ ដោយកិច្ចពិភាក្សាផ្តោតលើកិច្ចសហប្រតិបត្តិការបញ្ញាសិប្បនិម្មិត (AI) និងកិច្ចព្រមព្រៀងយន្តហោះចម្បាំង Dassault Rafale ដែលមានតម្លៃរាប់ពាន់លានដុល្លារ។

ប្រទេសបារាំងកំពុងស្វែងរកការពង្រីកភាពជាដៃគូយោធារបស់ខ្លួន ជាមួយទីក្រុងញូវដែលី ដោយមានការពិភាក្សាអំពីកិច្ចសន្យាដែលអាចកើតមានសម្រាប់យន្តហោះចម្បាំងបារាំងចំនួន ១១៤គ្រឿង បន្ថែម ទៀត។

លោក ម៉ាក្រុង និងភរិយារបស់ខ្លួន លោកស្រី Brigitte បានមកដល់នៅពាក់កណ្តាលអធ្រាត្រថ្ងៃចន្ទ នៅទីក្រុងម៉ុមបៃ (Mumbai) ដែលជារដ្ឋធានីហិរញ្ញវត្ថុរបស់ប្រទេសឥណ្ឌា សម្រាប់ដំណើរទស្សនកិច្ចលើកទី៤ របស់លោក ទៅកាន់ប្រទេសនេះ ចាប់តាំងពីចូលកាន់តំណែងនៅឆ្នាំ ២០១៧។

លោកគ្រោងជួបជាមួយលោកនាយករដ្ឋមន្ត្រី ណារិនដ្រា ម៉ូឌី ( Narendra Modi) នៅល្ងាចថ្ងៃអង្គារ នេះ។

បន្ទាប់មកលោក ម៉ាក្រុង នឹងធ្វើដំណើរទៅកាន់ទីក្រុងញូវដែលីសម្រាប់កិច្ចប្រជុំកំពូលបញ្ញាសិប្បនិម្មិត នៅថ្ងៃពុធ និងថ្ងៃព្រហស្បតិ៍។

ដំណើរទស្សនកិច្ចនេះ ធ្វើឡើង បន្ទាប់ពីការបញ្ជាក់របស់ទីក្រុងញូវដែលីកាលពីសប្តាហ៍មុនថា ខ្លួនមានបំណងដាក់ការបញ្ជាទិញដ៏សំខាន់សម្រាប់យន្តហោះចម្បាំង Rafale ក៏ដូចជាការចុះហត្ថលេខាលើកិច្ចព្រមព្រៀងពាណិជ្ជកម្មសេរីដ៏សំខាន់រវាងប្រទេសឥណ្ឌា និងសហភាពអឺរ៉ុប នៅក្នុងខែមករា។

ទីក្រុងញូវដែលីបានស្វែងរកក្នុងរយៈពេលមួយទសវត្សរ៍កន្លងមកនេះ ដើម្បីកាត់បន្ថយការពឹងផ្អែកលើប្រទេសរុស្ស៊ី ដែលជាអ្នកផ្គត់ផ្គង់គ្រឿងយុទ្ធោបករណ៍ដ៏សំខាន់របស់ខ្លួន ដោយងាកទៅរកប្រទេសដទៃទៀត ខណៈពេលដែលកំពុងជំរុញឲ្យមានការផលិតក្នុងស្រុកបន្ថែមទៀត៕