របាយការណ៍ផ្ទៀងផ្ទាត់ពីសារព័ត៌មានចក្រភពអង់គ្លេស BBC បានបញ្ជាក់ពីទីតាំងនៃនាវាផ្ទុកយន្តហោះអាមេរិក USS Abraham Lincoln នៅកៀកនឹងប្រទេសអ៊ីរ៉ង់ ដោយប្រើប្រាស់រូបភាពផ្កាយរណប ខណៈទីក្រុងវ៉ាស៊ីនតោន បានបន្តដាក់សម្ពាធលើប្រទេសនេះជុំវិញកម្មវិធីយោធារបស់ខ្លួន និងការបង្ក្រាបដ៏បង្ហូរឈាមនាពេលថ្មីៗនេះលើក្រុមបាតុករ។

របាយការណ៍និយាយថា នាវាផ្ទុកយន្តហោះ Abraham Lincoln ដែលដឹកនាំក្រុមប្រយុទ្ធមួយក្រុមធំ ជាមួយនាវាពិឃាតមីស៊ីលប្រើប្រព័ន្ធទូរបញ្ជា ៣គ្រឿង ដឹកយន្តហោះចំនួន ៩០គ្រឿង រួមទាំងយន្តហោះចម្បាំង F35 និងក្រុមបុគ្គលិកចំនួន ៥.៦៨០ នាក់ ត្រូវបានដាក់ពង្រាយទៅកាន់តំបន់ឈូងសមុទ្រកាលពីចុងខែមករា ប៉ុន្តែមិនត្រូវបានមើលឃើញទៀតទេនៅក្នុងរូបផ្កាយរណប រហូតមកដល់ពេលនេះ។ នាវាផ្ទុកយន្តហោះដ៏ធំនេះកំពុងស្ថិតនៅឆ្នេរសមុទ្រអូម៉ង់ ចម្ងាយប្រហែល ៧០០គីឡូម៉ែត្រ ពីអ៊ីរ៉ង់។

របាយការណ៍បន្តថា អាមេរិក ក៏បានបញ្ជូននាវាផ្ទុកយន្តហោះ USS Gerald R Ford ដែលជានាវាធំជាងគេបំផុតក្នុងពិភពលោក ទៅកាន់មជ្ឈិមបូព៌ាផងដែរ ហើយនាវានេះនឹងអាចទៅដល់តំបន់នោះក្នុងពេល ៣សប្តាហ៍ខាងមុខ។ វត្តមានរបស់នាវាផ្ទុកយន្តហោះទាំងនោះ បានបន្ថែមទៅលើអ្វីដែលគ្រប់គ្នាបានដឹងរួចទៅហើយ អំពីវត្តមានយោធាអាមេរិកដ៏ធំសម្បើមនាពេលបច្ចុប្បន្ននៅមជ្ឈិមបូព៌ា ក្នុងពេលប៉ុន្មានសប្តាហ៍កន្លងមកនេះ ខណៈរបាយការណ៍ BBC បានតាមដានឃើញកំណើននៃនាវាពិឃាត នាវាចម្បាំង និងយន្តហោះចម្បាំងរបស់អាមេរិក នៅក្នុងតំបន់។

ក្រុមមន្ត្រីអាមេរិក និងអ៊ីរ៉ង់ បានជួបប្រជុំគ្នានៅប្រទេសស្វីស នៅថ្ងៃអង្គារ ទី១៧ ខែកុម្ភៈ នេះសម្រាប់កិច្ចចរចាជុំទីពីរ។ លទ្ធផលនៃជំនួបមិនមាននៅឡើយទេ ប៉ុន្តែអ៊ីរ៉ង់បាននិយាយរួចហើយថា កិច្ចប្រជុំនេះនឹងផ្តោតលើកម្មវិធីនុយក្លេអ៊ែររបស់ខ្លួន និងការដកទណ្ឌកម្មសេដ្ឋកិច្ចដែលដាក់ដោយសហរដ្ឋអាមេរិក៕