ភ្នំពេញ​៖ សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតផ្តល់អង្ករ ១៤០តោនដល់ខណ្ឌទាំង១៤ចំណុះរដ្ឋបាលរាជធានីភ្នំពេញ ដើម្បីបន្តចែកជូនពលរដ្ឋក្រីក្រខ្វះខាត។

អំណោយជាអង្ករចំនួន ១៤០តោនរបស់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈ ឯកឧត្ដម ឃួង ស្រេង អភិបាលរាជធានីភ្នំពេញបានប្រគល់ជូនទៅខណ្ឌទាំង ១៤ ចំណុះរដ្ឋបាលរាជធានីភ្នំពេញ ដើម្បីបន្តយកទៅចែកជូនប្រជាពលរដ្ឋដែលជួបការលំបាកខ្វះខាតនៅក្នុងមូលដ្ឋាននៃខណ្ឌនីមួយៗ ហើយនៅថ្ងៃទី២០ ខែមីនា ឆ្នាំ២០២២ រដ្ឋបាលខណ្ឌទាំង១៤ បានទទួលអង្ករទាំងនេះនៅសាលារាជធានីភ្នំពេញ។

លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា អំណោយដ៏ថ្លៃថ្លារបស់សម្ដេចតេជោ ហ៊ុនសែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈអភិបាលរាជធានីភ្នំពេញ គឺបានប្រគល់ជូនក្នុងមួយខណ្ឌអង្ករ ១០តោន។ សម្តេចទាំទ្វេតែងតែយកចិត្តទុកដាក់ចំពោះសុខទុក្ខរបស់ប្រជាពលរដ្ឋ ដោយបានផ្ដល់នូវអំណោយជាបន្តបន្ទាប់ ជូនដល់ប្រជាពលរដ្ឋទីទ័លក្រនៅទូទាំងព្រះរាជាណាចក្រកម្ពុជា ។ 

ឯកឧត្ដម ឃួង ស្រេង ធ្លាប់មានប្រសាសន៍ផ្ដាំផ្ញើកន្លងមក ចំពោះប្រជាពលរដ្ឋ ដែលមានការខ្វះខាតក្នុងជីវភាព គឺអាចទាក់ទងទីស្នាក់ការគណបក្សប្រជាជនកម្ពុជាតាមសង្កាត់ នោះក្រុមការងារនឹងផ្តល់ការជួយឧបត្ថមដល់ប្រជាពលរដ្ឋភ្លាមៗ ដោយមិនទុកឱ្យប្រជាពលរដ្ឋអត់បាយនោះទេ ៕

អត្ថបទ ៖ ប្រាក់ វ៉ាន់ដា