លោក Marco Rubio រដ្ឋមន្ត្រីការបរទេស និងលោក Pete Hegseth ប្រមុខមន្ទីរបញ្ចកោណ បាននិយាយនៅក្នុងអត្ថបទមួយសម្រាប់សារព័ត៌មាន USA Today ថា ការបញ្ជាទិញអាវុធរបស់សហរដ្ឋអាមេរិក បានលើសពី ៩០០ ពាន់លានដុល្លារ ប៉ុន្តែសម្ព័ន្ធមិត្ត និងដៃគូ ត្រូវរង់ចាំការដឹកជញ្ជូន។ 

អត្ថបទនោះ បានបញ្ជាក់ថា៖«ការលក់អាវុធរបស់សហរដ្ឋអាមេរិក នៅតែស្ថិតក្នុងកម្រិតខ្ពស់បំផុតជាមួយនឹង ៤៣% នៃចំណែកទីផ្សារសកល» ដោយបន្ថែមថា ការបញ្ជាទិញបច្ចុប្បន្នជាង ១៦.000 មានតម្លៃសរុបគឺជាង ៩០០ពាន់លានដុល្លារ»។

ទោះជាយ៉ាងណាក៏ដោយ លោក Rubio និងលោក Hegseth កត់សម្គាល់ថា៖«សម្ព័ន្ធមិត្ត និងដៃគូដែលស្ម័គ្រចិត្តផ្តល់ការទូទាត់ជាមុន ត្រូវតែរង់ចាំដោយអត់ធ្មត់ ជារឿយៗច្រើនឆ្នាំ រហូតដល់យើងបានផលិតប្រព័ន្ធគ្រប់គ្រាន់ ដើម្បីលើសពីតម្រូវការរបស់យើង និងចាប់ផ្តើមបំពេញតម្រូវការរបស់ពួកគេ»។ ទន្ទឹមនឹងនេះ ពេលវេលាដ៏វែងអន្លាយធ្វើឲ្យសម្ព័ន្ធមិត្តសហរដ្ឋអាមេរិក «ងាកទៅរកអ្នកផ្គត់ផ្គង់ផ្សេងទៀត ដែលអះអាងថា ពួកគេអាចដឹកជញ្ជូនបានលឿនជាងមុន ទោះបីជាពួកគេផ្តល់ជូនផលិតផលដែលមានគុណភាពទាបជាងបន្តិចក៏ដោយ»។

អត្ថបទដដែល កត់សម្គាល់ថា រដ្ឋបាលសហរដ្ឋអាមេរិក ត្រូវស្វែងរកវិធីថ្មីក្នុងការគ្រប់គ្រងការលក់អាវុធ បន្ទាប់ពីយុទ្ធសាស្ត្រមុន បានបង្ហាញថា គ្មានប្រសិទ្ធភាព។ យុទ្ធសាស្ត្រថ្មីនេះ មានគោលបំណង «កាត់បន្ថយពេលវេលារង់ចាំ និងកាត់បន្ថយថ្លៃដើម»។ យោងតាមលោក Rubio និងលោក Hegseth «យុទ្ធ    សាស្ត្រនេះ ធ្វើឲ្យមូលដ្ឋានឧស្សាហកម្មការពារជាតិអាមេរិកមានភាពរស់រវើកឡើងវិញ ជាមួយនឹងកំណើន និងសមត្ថភាពផលិតកម្មកើនឡើង ហើយនេះមានន័យថា បង្កើតការវិនិយោគបន្ថែមរាប់រយពាន់លានដុល្លារសម្រាប់ខ្សែច្រវ៉ាក់ផលិតកម្ម»៕