នាយករដ្ឋមន្ត្រីអូស្ត្រាលី លោក Anthony Albanese បានប្រកាសថា រដ្ឋាភិបាលរបស់លោកនឹងមិនធ្វើមាតុភូមិនិវត្តន៍ស្ត្រី និងកុមារអូស្ត្រាលី ពីប្រទេសស៊ីរីនោះទេ ជាអ្នកដែលត្រូវបានកំណត់អត្តសញ្ញាណថាជាសាច់ញាតិរបស់ក្រុមអ្នកប្រយុទ្ធអាយស៊ីសដែលសង្ស័យ។

លោក Albanese បានប្រាប់សារព័ត៌មាន ABC News នៅថ្ងៃអង្គារនេះថា «យើងមានទស្សនៈយ៉ាងមុតមាំថា យើងនឹងមិនផ្តល់ជំនួយ ឬការធ្វើមាតុភូមិនិវត្តន៍នោះទេ»។ លោក Albanese និយាយថា ខណៈវាជារឿង «សោកស្តាយ» ដែលកុមារបានរងផលប៉ះពាល់ ប្រទេសអូស្ត្រាលី «មិនផ្តល់ការគាំទ្រណាមួយឡើយ»។ លោកនិយាយថា «ដូចដែលម្តាយរបស់ខ្ញុំបាននិយាយថា អ្នកប្រព្រឹត្តអ្វី ដូច្នេះអ្នកត្រូវតែទទួលនូវផលនោះ»។

លោកបាននិយាយបន្ថែមថា «យើងពុំមានការអាណិតអាសូរទេ និយាយឱ្យត្រង់ទៅ សម្រាប់អ្នកដែលបានធ្វើដំណើរទៅក្រៅប្រទេស ដើម្បីចូលរួមក្នុងអ្វីដែលជាការប៉ុនប៉ងដើម្បីបំផ្លាញរបៀបរស់នៅរបស់យើង»។ អ្នកនាំពាក្យរបស់រដ្ឋមន្ត្រីក្រសួងមហាផ្ទៃអូស្ត្រាលី លោក Tony Burke ក៏បានព្រមានផងដែរថា អ្នកដែលវិលត្រឡប់ទៅប្រទេសអូស្ត្រាលីពីប្រទេសស៊ីរីវិញ នឹងប្រឈមមុខនឹងច្បាប់ ប្រសិនបើពួកគេបានប្រព្រឹត្តបទឧក្រិដ្ឋ។

ស្ត្រី និងកុមារសរុបចំនួន ៣៤ នាក់ដែលមានសញ្ជាតិអូស្ត្រាលី ត្រូវបានដោះលែងកាលពីថ្ងៃចន្ទ ពីជំរំឃុំឃាំង Roj គ្រប់គ្រងដោយក្រុមឃឺដ នៅភាគខាងជើងប្រទេសស៊ីរី។ ជនជាតិអូស្ត្រាលីទាំងនោះ ជាដែលត្រូវបានគេនិយាយថាជាសាច់ញាតិរបស់អ្នកប្រយុទ្ធអាយស៊ីស ក្រោយមកត្រូវបានបញ្ជូនត្រឡប់ទៅជំរំវិញ ដោយសារតែអ្វីដែលត្រូវបានពណ៌នាថាជា «ហេតុផលបច្ចេកទេស» នេះបើយោងតាមរបាយការណ៍របស់ទីភ្នាក់ងារសារព័ត៌មានរ៉យទ័រ និង AFP។