កាលពីថ្ងៃចន្ទ ក្រុមហាម៉ាសបានចោទប្រកាន់អ៊ីស្រាអែលពីបទប្រព្រឹត្ត «ការរំលោភបំពានយ៉ាងច្បាស់លាស់» លើយន្តការដែលបានព្រមព្រៀងគ្នាសម្រាប់ប្រតិបត្តិការឆ្លងកាត់រ៉ាហ្វា (Rafah) ដែលត្រូវបានចែងនៅក្នុងកិច្ចព្រមព្រៀងឈប់បាញ់ដែលកំពុងដំណើរការ។

នៅក្នុងសេចក្តីថ្លែងការណ៍សារព័ត៌មានមួយ ក្រុមនេះ បាននិយាយថា ទោះបីជាមានការបើកច្រកឆ្លងកាត់នេះឡើងវិញ នៅក្នុងទិសដៅទាំងពីរក៏ដោយ អ៊ីស្រាអែលបានរំលោភលើក្របខណ្ឌប្រតិបត្តិការរបស់ខ្លួន និងបានរំលោភបំពានជាប្រព័ន្ធប្រឆាំងនឹងប្រជាជនប៉ាឡេស្ទីនដែលវិលត្រឡប់ទៅតំបន់ហ្សាវិញ រួមទាំងការធ្វើបាបរាងកាយ និងផ្លូវចិត្ត និងការសួរចម្លើយយ៉ាងឃោរឃៅ។

យោងតាមក្រុមហាម៉ាស អ៊ីស្រាអែលបានបរាជ័យក្នុងការប្រកាន់ខ្ជាប់នូវកូតាប្រចាំថ្ងៃសម្រាប់អ្នកដែលចេញ ឬចូលតំបន់ហ្កាហ្សា ដែលធ្វើឲ្យគ្រោះថ្នាក់ដល់អ្នកជំងឺរាប់ពាន់នាក់ និងបុគ្គលរងរបួសដែលមានការបញ្ជូនទៅកាន់មន្ទីរពេទ្យនៅបរទេស។

ក្រុមហាម៉ាសបានជំរុញឲ្យអ្នកសម្របសម្រួល និងរដ្ឋធានាធ្វើអន្តរាគមន៍ និងបង្ខំអ៊ីស្រាអែលឲ្យបើកច្រកឆ្លងកាត់ស្របតាមច្បាប់មនុស្សធម៌អន្តរជាតិ។

ការិយាល័យសម្របសម្រួលសកម្មភាពរដ្ឋាភិបាលក្នុងដែនដីនេះ (COGAT) ដែលជាស្ថាប័នមួយក្រោមក្រសួងការពារជាតិអ៊ីស្រាអែល បាននិយាយកាលពីថ្ងៃអាទិត្យថា អ្នកជំងឺ និងអ្នកអមដំណើរប្រហែល ៣២០ នាក់ បានចេញពីតំបន់ហ្កាហ្សាតាមរយៈច្រកឆ្លងកាត់ក្នុងរយៈពេលពីរសប្តាហ៍កន្លងមក ហើយមនុស្សចំនួនប្រហាក់ប្រហែលគ្នា បានចូលទៅក្នុងតំបន់នោះ ក្នុងអំឡុងពេលនេះ៕