ជនជាតិប៉ាឡេស្ទីនយ៉ាងតិច ៦០៣នាក់ ត្រូវបានសម្លាប់ និង ១.៦១៨នាក់ទៀត បានរងរបួសនៅក្នុងការវាយប្រហាររបស់អ៊ីស្រាអែល ចាប់តាំងពីថ្ងៃទី ១០ ខែតុលា ឆ្នាំ ២០២៥ នៅពេលដែលបទឈប់បាញ់ចូលជាធរមាន។ នេះបើយោងតាមក្រសួងសុខាភិបាលនៃតំបន់នេះ។

យោងតាមក្រសួង មនុស្សពីរនាក់ត្រូវបានសម្លាប់ និង ១១នាក់ បានស្វែងរកជំនួយផ្នែកវេជ្ជសាស្រ្ត នៅក្នុងតំបន់នេះ កាលពីថ្ងៃអាទិត្យ (ទី១៥ ខែកុម្ភៈ)។ ចំនួនអ្នកស្លាប់សរុបពីប្រតិបត្តិការរបស់អ៊ីស្រាអែលនៅក្នុងតំបន់ហ្កាហ្សា ចាប់តាំងពីខែតុលា ឆ្នាំ ២០២៣ បានឈានដល់ ៧២.០៦៣នាក់ ដោយមានមនុស្សជាង ១៧១.០០០នាក់ រងរបួស។

អាជ្ញាធរហ្កាហ្សា បាននិយាយកាលពីថ្ងៃទី ១០ ខែកុម្ភៈថា ការរំលោភបំពានបទឈប់បាញ់ជាង ១.៦០០ករណីដោយអ៊ីស្រាអែល ត្រូវបានរាយការណ៍ក្នុងរយៈពេល ៤ខែនៃការអនុវត្តបទឈប់បាញ់នេះ។

ភាពតានតឹងបានផ្ទុះឡើងនៅមជ្ឈិមបូព៌ា នៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមយុទ្ធជន មកពីចលនាសកម្មប្រយុទ្ធប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានបើកការវាយប្រហារដោយមិននឹកស្មានដល់ទៅលើអ៊ីស្រាអែល ដោយបានសម្លាប់ប្រជាជននៅតំបន់ព្រំដែន និងចាប់  ជាចំណាប់ថ្នូរជាង ២៥០នាក់។ ជាការឆ្លើយតប អ៊ីស្រាអែលបានផ្តួចផ្តើមប្រតិបត្តិការយោធា នៅក្នុងតំបន់ប៉ាឡេស្ទីន ដើម្បីរុះរើរចនាសម្ព័ន្ធយោធា និងនយោបាយរបស់ក្រុមហាម៉ាស និងដោះលែងចំណាប់ខ្មាំងទាំងអស់៕