ការបំផ្ទុះគ្រាប់បែក ២លើក និងការផ្ទុះអាវុធ រវាងក្រុមនគរបាល និងក្រុមឧទ្ទាមនៅតំបន់ភាគពាយព្យប៉ាគីស្ថាន បានសម្លាប់មនុស្សរាប់សិបនាក់ ។

យោធាប៉ាគីស្ថាននិយាយនៅថ្ងៃអង្គារនេះថា កងកម្លាំងសន្តិសុខ ១៧នាក់ និងក្មេងម្នាក់ ត្រូវបានសម្លាប់ក្នុងការវាយប្រហារនៅស្រុក Bajaur ស្ថិតក្នុងខេត្ត Khyber Pakhtunkhwa កាលពីថ្ងៃចន្ទម្សិលមិញ ខណៈដែលមនុស្ស ៧នាក់ផ្សេងទៀត រួមទាំងស្រ្តី និងកុមារដែរនោះ បានរងរបួសផងដែរ នៅក្នុងឧបទ្ទេវហេតុមួយនេះ ។

លោក Zafar Khan គឺជានគរបាលក្នុងស្រុកមួយរូប និយាយប្រាប់ទីភ្នាក់ងារព័ត៌មាន APថា រថយន្តផ្ទុកគ្រឿងផ្ទុះ បានផ្ទុះឡើង ពេលកំពុងបើកបរឆ្ពោះទៅកាន់ប៉ុស្តិ៍ត្រួតពិនិត្យសន្តិសុខនៅស្រុក Bajaur ហើយក្មេងស្រីម្នាក់ បានស្លាប់ ពេលដែលអគារក្បែរនោះបាក់រលំ ដោយសារឥទ្ធិពលនៃកម្លាំងផ្ទុះគ្រាប់ ។

ឧបទ្ទេវហេតុនេះដែរ បានកើតមានឡើង ក្រោយក្រុមមន្រ្តីជួយសង្រ្គោះ និយាយថា មនុស្ស ២នាក់ ត្រូវបានសម្លាប់កាលពីព្រឹកថ្ងៃចន្ទ ពេលដែលគ្រឿងផ្ទុះបង្កប់ក្នុងទោចចក្រយានយន្តចតចោល បានផ្ទុះឡើងនៅជិតច្រកចូលអធិការដ្ឋាននគបាលស្រុក Bannu ដែលជាស្រុកមួយទៀត នៅខេត្ត Khyber Pakhtunkhwa ស្ថិតនៅជិតព្រំដែអាហ្វហ្កានីស្ថាន ។  

ក្រុមមន្រ្តីនិយាយថា មនុស្សយ៉ាងហោច ១៧នាក់ បានរងរបួសនៅក្នុងការវាយប្រហារក្នុងស្រុក Bannu ៕