រដ្ឋាភិបាលលីបង់ បានឲ្យដឹងកាលពីថ្ងៃចន្ទ (ទី១៦ ខែកុម្ភៈ ឆ្នាំ២០២៦) ថា កងទ័ពនឹងត្រូវការរយៈពេលយ៉ាងហោចណាស់ ៤ខែ ដើម្បីអនុវត្តដំណាក់កាលទី២ នៃផែនការរបស់យោធា ក្នុងការរំសាយអាវុធរបស់ក្រុមសកម្មប្រយុទ្ធហេសបូឡា នៅភាគខាងត្បូងរបស់ប្រទេស។

រដ្ឋាភិបាលលីបង់កាលពីឆ្នាំមុនបានប្តេជ្ញាចិត្ត ក្នុងការរំសាយអាវុធរបស់ហេសបូឡា ដែលត្រូវបានធ្វើឲ្យចុះខ្សោយយ៉ាងខ្លាំង នៅក្នុងសង្គ្រាមថ្មីៗនេះជាមួយអ៊ីស្រាអែល ហើយបានប្រគល់ភារកិច្ចឲ្យកងទ័ពរៀបចំផែនការ ដើម្បីធ្វើកិច្ចការនោះ។

យោធាបានបញ្ជាក់កាលពីខែមុនថា ខ្លួនបានបញ្ចប់ដំណាក់កាលទី ១ នៃផែនការនេះហើយ ដោយគ្របដណ្តប់លើតំបន់ រវាងទន្លេ Litani និងព្រំដែនអ៊ីស្រាអែល នៅចុងភាគខាងត្បូងចម្ងាយប្រហែល ៣០គីឡូម៉ែត្រ។ ដំណាក់កាលទី២ ទាក់ទងនឹងតំបន់ រវាងទន្លេ Litani និងទន្លេ Awali ប្រហែល ៤០គីឡូម៉ែត្រ នៅភាគខាងត្បូងនៃទីក្រុងបេរូត។

រដ្ឋមន្ត្រីក្រសួងព័ត៌មាន លោក Paul Morcos បានប្រាប់សន្និសីទសារព័ត៌មានបន្ទាប់ពីមានសម័យប្រជុំគណៈរដ្ឋមន្ត្រីថា រដ្ឋាភិបាល «បានទទួលយកការបង្ហាញរបស់ថ្នាក់ដឹកនាំកងទ័ព» ជុំវិញដំណាក់កាលទី២ នៃផែនការនេះ។ លោកបាននិយាយថា៖ «មានរយៈពេល ៤ខែ ដោយអាចមានការពង្រីកបន្ថែមអាស្រ័យលើលទ្ធភាពជាក់ស្ដែង ការវាយប្រហាររបស់អ៊ីស្រាអែល និងឧបសគ្គនានា»។

អ៊ីស្រាអែល ដែលចោទប្រកាន់ក្រុមហេសបូឡាថា បានរៀបចំបំពាក់អាវុធឡើងវិញ បានរិះគន់វឌ្ឍនភាពរបស់កងទ័ពថា មិនគ្រប់គ្រាន់ ហើយបានបន្តការវាយប្រហារជាប្រចាំលើលីបង់ ទោះបីជាមានបទឈប់បាញ់ខែវិច្ឆិកា ឆ្នាំ២០២៤ ដែលបានស្វែងរកការបញ្ចប់អរិភាពជាងមួយឆ្នាំ ជាមួយក្រុមដែលគាំទ្រដោយអ៊ីរ៉ង់ក៏ដោយ៕