នាយករដ្ឋមន្ត្រីប៉ាឡេស្ទីន លោក Mohammad Mustafa កាលពីថ្ងៃចន្ទ បានអំពាវនាវឲ្យមានកិច្ចខិតខំប្រឹងប្រែងរបស់អន្តរជាតិកាន់តែខ្លាំងឡើង ដើម្បីដាក់សម្ពាធលើអ៊ីស្រាអែលឲ្យអនុវត្តដំណាក់កាលទី ២ នៃកិច្ចព្រមព្រៀងបទឈប់បាញ់នៅតំបន់ហ្កាហ្សា។

ក្នុងអំឡុងពេលនៃកិច្ចប្រជុំមួយនៅទីក្រុងរ៉ាម៉ាឡានៃតំបន់វេសបែង ជាមួយរដ្ឋមន្ត្រីការបរទេសហ្វាំងឡង់ លោកស្រី Elina Valtonen លោក Mustafa បានសង្កត់ធ្ងន់លើតម្រូវការក្នុងការបង្កើនការចូលនូវជំនួយមនុស្សធម៌ និងសម្ភារៈសម្រាប់ជំនួយសង្គ្រោះ ការស្តារឡើងវិញ និងជម្រកបណ្តោះអាសន្ន។ នេះបើយោងតាមសេចក្តីថ្លែងការណ៍មួយដែលចេញដោយការិយាល័យរបស់លោក។

លោកក៏បានជំរុញឲ្យមានការអនុវត្តបទឈប់បាញ់ប្រកបដោយប្រសិទ្ធភាពផងដែរ ដោយកត់សម្គាល់ថា ប្រជាជនប៉ាឡេស្ទីនរាប់រយនាក់ ត្រូវបានសម្លាប់ ចាប់តាំងពីបទឈប់បាញ់រវាងអ៊ីស្រាអែល និងក្រុមហាម៉ាស បានចូលជាធរមាន នៅក្នុងខែតុលា ឆ្នាំ ២០២៥។

ទាក់ទងនឹងស្ថានភាពនៅតំបន់វេសបែង និងទីក្រុងហ្ស៊េរុយសាឡឹមខាងកើត លោក Mustafa បានព្រមានប្រឆាំងនឹងផែនការបន្តរបស់អ៊ីស្រាអែលសម្រាប់ «ការបញ្ចូល និងការពង្រីកការតាំងទីលំនៅ» ក៏ដូចជាការវាយឆ្មក់ជាបន្តបន្ទាប់ ចំណុចត្រួតពិនិត្យ ការវាយប្រហារដោយអ្នកតាំងទីលំនៅ និងការដកហូតប្រាក់ចំណូលពន្ធប៉ាឡេស្ទីន។

លោក Mustafa បានគូសបញ្ជាក់ពីតម្រូវការក្នុងការជំរុញការអនុវត្តសេចក្តីសម្រេចរបស់អង្គការសហប្រជាជាតិពាក់ព័ន្ធលើបញ្ហាប៉ាឡេស្ទីន ដើម្បីរក្សាឯកភាពនៃទឹកដីប៉ាឡេស្ទីន សម្រេចបានរដ្ឋឯករាជ្យមួយ និងអនុញ្ញាតឲ្យរដ្ឋាភិបាលបំពេញកាតព្វកិច្ចរបស់ខ្លួនចំពោះប្រជាជនប៉ាឡេស្ទីន នៅតំបន់ហ្កាហ្សា និងតំបន់វេសបែង រួមទាំងទីក្រុងហ្ស៊េរុយសាឡឹមខាងកើតផងដែរ។

សេចក្តីថ្លែងការណ៍នេះបានឲ្យដឹងថា ចំណែកលោកស្រី Valtonen បានបញ្ជាក់ជាថ្មីនូវការគាំទ្ររបស់ប្រទេសហ្វាំងឡង់ចំពោះកិច្ចខិតខំប្រឹងប្រែង ដើម្បីបញ្ចប់សង្គ្រាមនៅតំបន់ហ្កាហ្សា ជំរុញការស្តារឡើងវិញ និងការកសាងឡើងវិញ និងគាំទ្រសេចក្តីសម្រេចអន្តរជាតិដែលមានគោលបំណងពង្រឹងដំណោះស្រាយរដ្ឋពីរ និងសម្រេចបាននូវស្ថិរភាពក្នុងតំបន់៕