មេដឹកនាំកំពូលអ៊ីរ៉ង់ លោក Ali Khamenei បាននិយាយថា សហរដ្ឋអាមេរិកនឹងមិនគ្មានថ្ងៃទទួលបានជោគជ័យនោះឡើយ ក្នុងការផ្តួលរំលំសាធារណរដ្ឋឥស្លាម ហើយលោកបានព្រមានថា សូម្បីតែយោធាខ្លាំងបំផុតរបស់ពិភពលោក ក៏អាចរងការវាយប្រហារយ៉ាងធ្ងន់ធ្ងរបានដែរ។

លោក Khamenei បានថ្លែងនៅក្នុងសុន្ទរកថាមួយរបស់លោកថ្មីៗនេះថា អស់រយៈពេល ៤៧ឆ្នាំមកហើយ អាមេរិកមិនអាចលុបបំបាត់សាធារណរដ្ឋឥស្លាមបានទេ ខណៈដែលលោកបានបង្ហាញនូវកំហឹង អំពីប្រទេសគូសត្រូវទៅកាន់ប្រជាជនរបស់លោក។ អំឡុងការជួបជុំជាមួយប្រជាជនមកពីខេត្ត East Azarbaijan នាថ្ងៃអង្គារ (ទី១៧ ខែកុម្ភៈ ឆ្នាំ២០២៦) នេះ លោក Khamenei បានលើកឡើងថា៖ «អស់រយៈពេល ៤៧ឆ្នាំមកហើយ អាមេរិកមិនអាចលុបបំបាត់សាធារណរដ្ឋឥស្លាមបានឡើយ។ នោះគឺជាការពិតមិនអាចកែប្រែបាន។ ហើយខ្ញុំសូមនិយាយថា អ្នកក៏នឹងមិនអាចធ្វើបែបនេះបានដូចគ្នាដែរ ក្នុងពេលខាងមុខ»។

ការអត្ថាធិប្បាយរបស់លោកនេះ បានកើតឡើងប៉ុន្មានថ្ងៃបន្ទាប់ពីលោក Trump បាននិយាយថា ការផ្លាស់ប្តូររបប «នឹងជារឿងដ៏ល្អបំផុតដែលអាចកើតឡើង»។

ជាមួយគ្នានេះ លោក Khamenei ក៏បានលើកឡើងពីការកត់សម្គាល់ម្តងហើយម្តងទៀតរបស់ប្រធានាធិបតីអាមេរិកថា យោធាអាមេរិក គឺជាកងទ័ពខ្លាំងបំផុត នៅលើពិភពលោក។ តែលោកបានបញ្ជាក់ថា «កងទ័ពខ្លាំងបំផុតនៅលើពិភពលោក ពេលខ្លះអាចនឹងទទួលរងនូវការវាយប្រហារយ៉ាងខ្លាំងក្លា រហូតលែងអាចងើបឡើងបាន»។

ការអត្ថាធិប្បាយរបស់លោកកើតឡើងស្របពេលមានវោហាសាស្ត្រកាន់តែក្ដៅគគុក រវាងទីក្រុងតេអេរ៉ង់ និងវ៉ាស៊ីនតោន ជុំវិញការដាក់ពង្រាយយោធា និងសន្តិសុខក្នុងតំបន់ ហើយនៅពេលដែលការចរចាជុំថ្មីមួយសម្របសម្រួលដោយប្រទេសអូម៉ង់ កំពុងដំណើរការនៅទីក្រុងហ្សឺណែវ ប្រទេសស្វីស៕