លោក Nikolai Patrushev ដែលជាសម្ព័ន្ធមិត្តជិតស្និទ្ធរបស់លោកប្រធានាធិបតី Vladimir Putin ត្រូវបានដកស្រង់សម្តី នៅថ្ងៃអង្គារ (ទី១៧ ខែកុម្ភៈ ឆ្នាំ២០២៦) នេះ ដែលបាននិយាយថា រុស្ស៊ីអាចដាក់ពង្រាយកងទ័ពជើងទឹក ដើម្បីទប់ស្កាត់មហាអំណាចអឺរ៉ុបកុំឲ្យរឹបអូសនាវារបស់ខ្លួន ហើយអាចសងសឹកទៅលើការដឹកជញ្ជូនទំនិញរបស់អឺរ៉ុបវិញ ប្រសិនបើនាវារុស្ស៊ីត្រូវបានរឹបអូស។

បណ្ដារដ្ឋលោកខាងលិចបានព្យាយាមកាត់ផ្តាច់រុស្ស៊ីពីពាណិជ្ជកម្មសកល និងធ្វើឲ្យប្រព័ន្ធហិរញ្ញវត្ថុរបស់ប្រទេសនេះចុះខ្សោយ ដោយដាក់ចេញនូវវិធានការទណ្ឌកម្មជាង ៣០.០០០ ពាក់ព័ន្ធនឹងសង្គ្រាមរបស់ទីក្រុងមូស្គូ នៅប្រទេសអ៊ុយក្រែន។

រដ្ឋទាំងនោះក៏បានព្យាយាមរារាំងនាវាដឹកប្រេងដែលសង្ស័យថា មានជាប់ពាក់ព័ន្ធនឹងការដឹកជញ្ជូនប្រេងរបស់រុស្ស៊ីផងដែរ។ កាលពីខែមករា សហរដ្ឋអាមេរិកបានរឹបអូសនាវាដឹកប្រេងដែលមានទង់ជាតិរុស្ស៊ី ជាផ្នែកមួយនៃកិច្ចប្រឹងប្រែង ដើម្បីទប់ស្កាត់ការនាំចេញប្រេងរបស់វ៉េណេស៊ុយអេឡា។

លោក Putin បានពិពណ៌នាអំពីសកម្មភាពបែបនេះថា ជាទង្វើចោរសមុទ្រ។ ហើយជំនួយការវិមានក្រឹមឡាំង និងជាប្រធានក្រុមប្រឹក្សាភិបាលសមុទ្ររបស់រុស្ស៊ី គឺលោក Patrushev បានប្រាប់ប្រព័ន្ធផ្សព្វផ្សាយរុស្ស៊ី Argumenty i Fakty ថា៖ «ប្រសិនបើយើងមិនរារាំងពួកគេយ៉ាងម៉ឺងម៉ាត់នោះទេ មិនយូរឡើយ អង់គ្លេស បារាំង និងសូម្បីតែបណ្ដាប្រទេសបាល់ទិក នឹងមានភាពក្រអឺតក្រទមជាមិនខាន ពោលគឺដល់កម្រិតមួយ ដែលពួកគេនឹងព្យាយាមបិទខ្ទប់សិទ្ធិចូលទៅកាន់សមុទ្ររបស់ប្រទេសយើង ដោយយ៉ាងហោចណាស់ក៏នៅក្នុងអាងមហាសមុទ្រអាត្លង់ទិកដែរ»។

លោក Patrushev បានសង្កត់ធ្ងន់ថា៖ «យើងជឿជាក់ថា មិនខុសអ្វីពីមុនឡើយ ការធានាដ៏ល្អបំផុតនូវសុវត្ថិភាពនៃការធ្វើនាវាចរណ៍ គឺកងទ័ពជើងទឹក។ នៅក្នុងតំបន់សមុទ្រសំខាន់ៗ រួមទាំងតំបន់ឆ្ងាយពីរុស្ស៊ីផងដែរ កងកម្លាំងសំខាន់ៗ ត្រូវតែដាក់ពង្រាយជាអចិន្ត្រៃយ៍ ពោលគឺកងកម្លាំងដែលមានសមត្ថភាពបន្ថយមហិច្ឆតារបស់ចោរសមុទ្រលោកខាងលិច»៕