អ្នកនាំពាក្យវិមានក្រឹមឡាំងនិយាយប្រាប់ក្រុមអ្នកសារព័ត៌មានថា ខ្លួនពុំរំពឹងថានឹងទទួលបានដំណឹងណាមួយពីកិច្ចប្រជុំសន្តិភាពនៅអ៊ុយក្រែននាថ្ងៃអង្គារនេះទេ ដែលរៀបចំឡើងនៅក្នុងទីក្រុងហ្សឺណែវ ប្រទេសស្វីស រវាងរុស្ស៊ី អ៊ុយក្រែន និងសហរដ្ឋអាមេរិក ដោយលោកនិយាយថា កិច្ចចរចា នឹងរៀបចំឡើងក្នុងបន្ទប់បិទទ្វារ ។

អ្នកនាំពាក្យវិមានក្រឹមឡាំងលោក Dmitry Peskov និយាយថា កិច្ចប្រជុំនឹងបន្តទៀតនៅថ្ងៃពុធស្អែក ហើយអ្នកសារព័ត៌មានពុំត្រូវបានអនុញ្ញាតឲ្យចូលក្នុងជំនួបនោះឡើយ ។ លោកថា លោកពុំគិតថា ពួកយើងនឹងទទួលបានដំណឹងណាមួយនៅថ្ងៃនេះទេ ។

លោក Peskov និយាយទៀតថា កិច្ចប្រជុំត្រីភាគីនៅថ្ងៃនេះរវាងរុស្ស៊ី អ៊ុយក្រែន និងសហរដ្ឋអាមេរិក គណៈប្រតិភូរបស់ពួកយើងនៅទីនោះ លោកពុំគិតថា ពួកយើងនឹងទទួលបានលទ្ធផលនោះទេ ពីព្រោះថា កិច្ចប្រជុំត្រូវកំណត់ឲ្យបន្តនៅថ្ងៃស្អែកទៀត ។ ពុំមានផែនការនោះទេ ដើម្បីធ្វើសេចក្តីថ្លែងការណ៍ណាមួយ ជាការពិតណាស់ថា អ្វីៗនឹងត្រូវរៀបចំឡើងនៅក្នុងបន្ទប់បិទជិត ។

វិមានក្រឹមឡាំង បានបញ្ជាក់ថា គណៈប្រតិភូរុស្ស៊ី ត្រូវបានដឹកនាំដោយលោក Vladimir Medinsky ដែលជំនួយការរបស់ប្រធានាធិបតីរុស្ស៊ី លោក Vladimir Putin។

សូមបញ្ជាក់ថា ប្រធានាធិបតីសហរដ្ឋអាមេរិក លោក Donald Trump បាននិយាយថា លោកចង់សម្របសម្រួលបញ្ចប់ជម្លោះដែលលោកចាត់ទុកថាជា ការបង្ហូរឈាមគ្មានន័យ ទោះបីជារុស្ស៊ី និងអ៊ុយក្រែននៅតែឃ្លាតឆ្ងាយគ្នាលើបញ្ហាសំខាន់ៗ រួមទាំងបញ្ហាទឹកដីដែលគ្រប់គ្រងនៅរោងចក្រថាមពលនុយក្លេអ៊ែរ Zaporizhzhia និងតួនាទីរបស់កងទ័ពលោកខាងលិចនៅក្នុងប្រទេសអ៊ុយក្រែននៅក្រោយសង្គ្រាម ក៏ដោយ ៕