រដ្ឋាភិបាលដូមីនីកនិយាយកាលពីថ្ងៃចន្ទថា ក្រុមអាជ្ញាធរពួកគេ រឹបអូសបានសារធាតុកូកាអ៊ីនសង្ស័យទម្ងន់ជាង ២តោន ក្រោយស្កាត់ជាប់ទូកមួយគ្រឿង នៅជិតតំបន់ឆ្នេរខេត្ត Peravia ដោយមានការគាំទ្រពីសហរដ្ឋអាមេរិក ។

ប្រតិបត្តិការនេះជាប់ពាក់ព័ន្ធនឹងអង្គភាពមកពីកងទ័ពជើងទឹក ជើងអាកាស និងជើងគោក រួមទាំងមេបញ្ជាការភូមិភាគត្បូងរបស់សហរដ្ឋអាមេរិក ដោយចុះប្រតិបត្តិការឃ្លាំមើលរយៈពេលជាង ១៥ម៉ោង មុនពេលស្កាត់ជាប់ទូក Go Fast មួយគ្រឿង ដែលពុំបានចុះបញ្ជី និងធ្វើដំណើរមកពីអាមេរិកខាងត្បូង ។

ក្រុមមន្រ្តីនិយាយថា ទូកមួយគ្រឿងនេះ ដឹកគ្រឿងញៀនចំនួន ២.០៤៩កញ្ចប់ មានទម្ងន់ប្រហែល ២តោន និងមានបិតឡូហ្គោផ្សេងៗគ្នា ។

យោងតាមសេចក្តីថ្លែងការណ៍ បានឲ្យដឹងថា ជនជាតិដូមីនីក ៦នាក់ ត្រូវបានចាប់ខ្លួន នៅក្នុងប្រតិបត្តិការចាប់ស្ទាក់ទូកដឹកគ្រឿងញៀនមួយគ្រឿងនេះ ៕