ក្រុមហាម៉ាស បានធ្វើការច្រានចោលសេចក្តីអត្ថាធិប្បាយរបស់មន្រ្តីរដ្ឋាភិបាលអ៊ីស្រាអែលដែលអំពាវនាវឲ្យក្រុមជីវពលមានមូលដ្ឋាននៅតំបន់ហ្កាហ្សាមួយនេះ រំសាយអាវុធ ក្នុងរយៈពេល ៦០ថ្ងៃ ហើយនិងគំរាមចាប់ផ្តើមឡើងវិញសង្រ្គាមប្រល័យពូជសាសន៍របស់អ៊ីស្រាអែល បើសិនជាពួកគេមិនអនុវត្តតាម ។

ទីប្រឹក្សាជាន់ខ្ពស់របស់នាយករដ្ឋមន្ត្រី Benjamin Netanyahu បាននិយាយកាលពីថ្ងៃចន្ទថា អ៊ីស្រាអែលមានគម្រោងផ្តល់ឱសានវាទរយៈពេល៦០ ថ្ងៃដល់ក្រុមហាម៉ាសដើម្បីរំសាយអាវុធ ហើយប្រសិនបើមិនដូច្នោះទេ យោធាអ៊ីស្រាអែលនឹងត្រលប់ទៅធ្វើសង្គ្រាមនៅតំបន់ហ្កាហ្សាវិញ ។

លោក Yossi Fuchs រដ្ឋមន្រ្តីទទួលបន្ទុកទីស្តីការគណៈរដ្ឋមន្ត្រី បានធ្វើសេចក្តីថ្លែងការណ៍បែបនេះ រយៈពេល ១ថ្ងៃបន្ទាប់ពីនាយករដ្ឋមន្ត្រីអ៊ីស្រាអែលបានអះអាងថា ក្រុមភេរវករត្រូវតែបោះបង់ចោលអាវុធរបស់ខ្លួនជាផ្នែកមួយនៃដំណើរការរំសាយអាវុធ រួមទាំងកាំភ្លើង AK-47ផងដែរ បន្ទាប់ពីមានរបាយការណ៍មួយចំនួនថា ក្រុមភេរវករមួយនេះ អាចត្រូវបានអនុញ្ញាតឲ្យកាន់កាំភ្លើងរបស់ខ្លួន ។

លោក Fuchs បានបញ្ជាក់ថា លោកមិនប្រាកដថា ពេលណាឱសានវាទរយៈពេល៦០ ថ្ងៃនឹងចាប់ផ្តើមនោះទេ ប៉ុន្តែប្រហែលអាចចាប់ផ្តើមជាមួយនឹងសន្និសីទក្រុមប្រឹក្សាសន្តិភាពនៅថ្ងៃព្រហស្បតិ៍សប្ដាហ៍នេះ ។

លោក Mahmoud Mardawi គឺជាមន្រ្តីជាន់ខ្ពស់មួយរូបរបស់ក្រុមហាម៉ាស និយាយប្រាប់កាសែត Al Jazeera កាលពីថ្ងៃចន្ទថា លោកពុំទទួលស្គាល់ការទាមទារបែបនេះនោះទេ ។

លោកថា សេចក្តីថ្លែងការណ៍ធ្វើឡើងដោយលោក Netanyahu និងតាមរយៈសារព័ត៌មាន គឺជាការគំរាមកំហែងមួយដោយគ្មានមូលដ្ឋាននៅក្នុងកិច្ចចរចាកំពុងបន្ត ៕