មេដឹកនាំកំពូលអ៊ីរ៉ង់ លោក Ayatollah Ali Khamenei បានវាយប្រហារដោយពាក្យសម្ដីតបវិញទៅលើប្រធានាធិបតីសហរដ្ឋអាមេរិក លោក Donald Trump ហើយបានបង្ហាញអាកប្បកិរិយាទុទិដ្ឋិនិយមលើការចរចាជាមួយរដ្ឋបាលរបស់លោក ទោះរដ្ឋមន្ត្រីការបរទេសអ៊ីរ៉ង់និយាយថា ការយោគយល់គ្នាអំពីគោលការណ៍ណែនាំ នៃកិច្ចព្រមព្រៀងមួយត្រូវបានឈានដល់ក៏ដោយ។

លោក Khamenei វ័យ៨៦ ឆ្នាំរូបនេះបាននិយាយកាលពីថ្ងៃអង្គារ១៧កុម្ភៈសប្ដាហ៍នេះថា លោក Trump បានទទួលស្គាល់ថា សហរដ្ឋអាមេរិកបានព្យាយាមផ្តួលរំលំស្ថាប័នសាសនានៅក្នុងប្រទេសអ៊ីរ៉ង់ចាប់តាំងពីបដិវត្តន៍អ៊ីស្លាមឆ្នាំ ១៩៧៩ របស់ប្រទេសនេះ ប៉ុន្តែបានបរាជ័យ។

លោក Khamenei បាននិយាយដោយសំដៅទៅកាន់ប្រធានាធិបតីអាមេរិក ដែលបានប្រាប់ក្រុមអ្នកសារព័ត៌មាននៅសប្តាហ៍នេះថា ការផ្លាស់ប្តូររដ្ឋាភិបាលនឹងជារឿងដ៏ល្អបំផុតដែលអាចកើតឡើង នៅក្នុងប្រទេសអ៊ីរ៉ង់ ថា នេះគឺជាការសារភាពយ៉ាងច្បាស់។អ្នកនឹងមិនអាចធ្វើបែបនេះបានទេ។

ការអត្ថាធិប្បាយរបស់លោកបានកើតឡើងប៉ុន្មានម៉ោងមុនពេលសេចក្តីថ្លែងការណ៍មួយដែលធ្វើឡើងដោយរដ្ឋមន្ត្រីការបរទេសអ៊ីរ៉ង់ លោក Abbas Araghchi បន្ទាប់ពីការបញ្ចប់កិច្ចចរចាដោយប្រយោលជាមួយសហរដ្ឋអាមេរិកនៅទីក្រុងហ្សឺណែវ។

រដ្ឋមន្ត្រីការបរទេសអូម៉ង់ លោក Sayyid Badr bin Hamad bin Hamood Albusaidi បាននិយាយថា កិច្ចចរចានុយក្លេអ៊ែរដោយប្រយោលលើកទីពីររវាងអ៊ីរ៉ង់ និងសហរដ្ឋអាមេរិកបានបញ្ចប់នៅទីក្រុងហ្សឺណែវកាលពីថ្ងៃអង្គារ ជាមួយនឹងវឌ្ឍនភាពល្អ៕