ក្រុមហាម៉ាសបានជំរុញ «ក្រុមប្រឹក្សាសន្តិភាព» របស់ប្រធានាធិបតី លោក Donald Trump ឱ្យបង្ខំអ៊ីស្រាអែល បញ្ឈប់ «ការរំលោភបំពានជាបន្តបន្ទាប់» នៃកិច្ចព្រមព្រៀងតំបន់ហ្កាហ្សា ដែលត្រូវបានសម្របសម្រួលដោយសហរដ្ឋអាមេរិកកាលពីខែតុលា ឆ្នាំមុន។ កិច្ចប្រជុំផ្លូវការលើកដំបូងរបស់ស្ថាប័នដ៏ចម្រូងចម្រាសនេះធ្វើឡើងនៅថ្ងៃព្រហស្បតិ៍ នៅទីក្រុងវ៉ាស៊ីនតោនឌី.ស៊ី ខណៈប្រជាជនប៉ាឡេស្ទីនដែលជាប់គាំងខ្លួននៅក្នុងដែនដីរងការបំផ្លាញដោយសង្គ្រាមកំពុងរង់ចាំដំណាក់កាលទីពីរនៃកិច្ចព្រមព្រៀងសន្តិភាពឱ្យចូលជាធរមានពេញលេញ។

អ្នកនាំពាក្យក្រុមហាម៉ាស លោក Hazem Qassem បាននិយាយនៅក្នុងសេចក្តីថ្លែងការណ៍តាមវីដេអូ ថា «សង្គ្រាមប្រល័យពូជសាសន៍ប្រឆាំងតំបន់ហ្កាហ្សានៅតែបន្តតាមរយៈការសម្លាប់ ការជម្លៀសប្រជាជន ការហ៊ុមព័ទ្ធ និងទុរ្ភិក្ស ដែលមិនទាន់ត្រូវបានបញ្ឈប់នៅឡើយរហូតមកដល់ពេលនេះ»។

យោងតាមអាជ្ញាធរសុខាភិបាលបានឲ្យដឹងថា ប្រជាជនប៉ាឡេស្ទីនជាង ៦០០ នាក់ត្រូវបានសម្លាប់ដោយកងកម្លាំងអ៊ីស្រាអែលនៅក្នុងតំបន់ហ្កាហ្សា ចាប់តាំងពីកិច្ចព្រមព្រៀងបទឈប់បាញ់ក្រុមហាម៉ាស-អ៊ីស្រាអែល ដែលបានចាប់ផ្តើមនៅថ្ងៃទី ១០ ខែតុលា ឆ្នាំ ២០២៥។ មនុស្សយ៉ាងហោចណាស់ ១.៦០០ នាក់ផ្សេងទៀតបានរងរបួសនៅក្នុងការបាញ់ផ្លោង ការបាញ់កាំភ្លើង និងការវាយប្រហារតាមអាកាសរបស់អ៊ីស្រាអែល។

លោក Qassem ក៏បានអំពាវនាវដល់ក្រុមប្រឹក្សារបស់លោក Trump ឲ្យជួយសម្រួលដល់ការចូលរបស់គណៈកម្មាធិការបច្ចេកទេសដែលត្រូវបានជ្រើសរើសដើម្បីគ្រប់គ្រងតំបន់ហ្កាហ្សា ហើយចាប់ផ្តើមកិច្ចខិតខំប្រឹងប្រែងកសាងឡើងវិញយ៉ាងទូលំទូលាយ ដើម្បី «បញ្ចប់ទុក្ខលំបាករបស់ប្រជាជន»។