សន្ទស្សន៍តម្លៃប្រេងបានធ្លាក់ចុះបន្តិចនៅថ្ងៃពុធ (១៨ កុម្ភៈ) នេះ ខណៈដែលកិច្ចចរចារវាងសហរដ្ឋអាមេរិក និងអ៊ីរ៉ង់ មានវឌ្ឍនភាពល្អមួយចំនួនន ដែលបង្កើនក្តីសង្ឃឹមសម្រាប់ការបន្ធូរភាពតានតឹងទ្វេភាគី និងកាត់បន្ថយហានិភ័យនៃការរំខានដល់ការផ្គត់ផ្គង់ពីបណ្ដាប្រទេសផលិតប្រេងនៅមជ្ឈិមបូព៌ា។

សន្ទស្សន៍ប្រេងឆៅ Brent បានធ្លាក់ចុះ ៣សេន ឬ ០,០៤% មកនៅត្រឹម ៦៧,៣៩ ដុល្លារក្នុងមួយបារ៉ែល នៅម៉ោងសកលទៀបភ្លឺថ្ងៃពុធនេះ ខណៈដែលប្រេងឆៅ WTI របស់សហរដ្ឋអាមេរិក បានធ្លាក់ចុះ ៥សេន ឬ ០,០៨% មកនៅត្រឹម ៦២,២៨ដុល្លារ។

ការបាត់បង់ជំហររបស់តម្លៃប្រេង កើតឡើងបន្ទាប់ពីលោករដ្ឋមន្ត្រីការបរទេសអ៊ីរ៉ង់ Abbas Araqchi បាននិយាយថា អ៊ីរ៉ង់ និងអាមេរិក បានឈានដល់ការយោគយល់គ្នាកាលពីថ្ងៃអង្គារ លើ «គោលការណ៍ណែនាំ» សំខាន់ៗក្នុងកិច្ចចរចា ដែលមានបំណងដោះស្រាយជម្លោះនុយក្លេអ៊ែរដ៏យូរអង្វែងរបស់ភាគីទាំងពីរ ប៉ុន្តែបែបនេះក៏មិនមែនមានន័យថា កិច្ចព្រមព្រៀងមួយនឹងកើតឡើងឆាប់ៗនោះទេ។

ក្រុមអ្នកវិភាគនៅប្រុងប្រយ័ត្នអំពីភាពអាចប្រែប្រួលនៃវឌ្ឍនភាពចុងក្រោយនេះ។ លោក Tony Sycamore អ្នកវិភាគទីផ្សារនៅស្ថាប័ន IG បាននិយាយក្នុងកំណត់ចំណាំមួយទៅកាន់អតិថិជនថា៖ «ខណៈដែលវឌ្ឍនភាពដ៏មានអត្ថន័យមួយ នឹងអាចបន្ធូរភាពតានតឹងភូមិសាស្ត្រនយោបាយ និងអាចជំរុញការផ្គត់ផ្គង់ប្រេងរបស់អ៊ីរ៉ង់ ប៉ុន្តែទីផ្សារនៅតែសង្ស័យថា លទ្ធផលនេះនឹងមានរយៈពេលខ្លីប៉ុណ្ណោះ»។ ក្រុមហ៊ុនប្រឹក្សាយោបល់នយោបាយ Eurasia Group បាននិយាយក្នុងកំណត់ចំណាំមួយកាលពីថ្ងៃអង្គារទៅកាន់អតិថិជនថា ខ្លួនគិតថាមានលទ្ធភាព ៦៥% នៃការវាយប្រហាររបស់អាមេរិក ប្រឆាំងនឹងអ៊ីរ៉ង់ នៅចុងខែមេសា ដ៏ឆាប់ខាងមុខនេះ៕