ទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍កាលពីថ្ងៃអង្គារថា ប្រធានាធិបតីអ៊ីរ៉ង់ លោក Masoud Pezeshkian បាននិយាយថា ប្រទេសនេះ នឹងមិនបោះបង់ចោលបច្ចេកវិទ្យានុយក្លេអ៊ែរ «ដោយសន្តិវិធី» របស់ខ្លួនឡើយ។

លោកបានធ្វើការអត្ថាធិប្បាយនេះ នៅក្នុងកិច្ចប្រជុំជាមួយសកម្មជនស៊ីវិលបីរូប ខណៈពេលដែលបង្ហាញពីការត្រៀមខ្លួនរបស់អ៊ីរ៉ង់ ក្នុងការបញ្ជាក់ពីលក្ខណៈសន្តិភាពនៃកម្មវិធីនុយក្លេអ៊ែររបស់ខ្លួន។

លោក Pezeshkian បាននិយាយថា អ៊ីរ៉ង់បានប្រកាសម្តងហើយម្តងទៀតថា ខ្លួនមិនស្វែងរកអាវុធនុយក្លេអ៊ែរ ដោយផ្អែកលើគោលនយោបាយដែលបានគូសបញ្ជាក់ និងក្រឹត្យសាសនាដែលចេញដោយមេដឹកនាំកំពូលលោក Ali Khamenei របស់ប្រទេសនោះទេ ដោយបន្ថែមថា ប្រទេសនេះ ត្រៀមខ្លួនរួចជាស្រេចសម្រាប់ការផ្ទៀងផ្ទាត់ណាមួយនៅក្នុងរឿងនេះ។

លោកបានសង្កត់ធ្ងន់ថា ទោះជាយ៉ាងណាក៏ដោយ ប្រទេសនេះ នឹងមិនទទួលយកការបដិសេធមិនឲ្យប្រើប្រាស់វិទ្យាសាស្ត្រ និងបច្ចេកវិទ្យានុយក្លេអ៊ែរ ដើម្បីព្យាបាលអ្នកជំងឺ និងអភិវឌ្ឍន៍ឧស្សាហកម្ម និងកសិកម្មរបស់ខ្លួនឡើយ។

ការអត្ថាធិប្បាយរបស់លោក បានកើតឡើង ស្របពេលមានភាពតានតឹងកាន់តែកើនឡើងខ្លាំងរវាងទីក្រុងតេអេរ៉ង់ និងទីក្រុងវ៉ាស៊ីនតោន និងការបង្កើនកម្លាំងយោធារបស់សហរដ្ឋអាមេរិក នៅអាស៊ីខាងលិច។

អ៊ីរ៉ង់ និងសហរដ្ឋអាមេរិក បានបញ្ចប់កិច្ចចរចានុយក្លេអ៊ែរដោយប្រយោលជុំទី២ នៅទីក្រុងហ្សឺណែវកាលពីថ្ងៃអង្គារ។ ការចរចានេះ ត្រូវបានធ្វើឡើងនៅស្ថានទូតអូម៉ង់ នៅក្នុងទីក្រុងស្វ៊ីស និងសម្របសម្រួលដោយរដ្ឋមន្ត្រីការបរទេសអូម៉ង់ លោក Sayyid Badr bin Hamad bin Hamood Albusaidi។ ការចរចាដោយប្រយោលជុំទី ១ ត្រូវបានធ្វើឡើង នៅរដ្ឋធានី Muscat ប្រទេសអូម៉ង់ នៅថ្ងៃទី ០៦ ខែកុម្ភៈ៕