មន្ត្រីបាននិយាយថា អាជ្ញាធរទួរគីកាលពីថ្ងៃអង្គារ បានឃាត់ខ្លួនជនសង្ស័យចំនួន ៨៨នាក់ នៅក្នុងការស៊ើបអង្កេតពីរដាច់ដោយឡែកពីគ្នាជុំវិញការសង្ស័យថា មានទំនាក់ទំនងជាមួយចលនា Gulen ដែលទីក្រុងអង់ការ៉ាចោទប្រកាន់ថា បានរៀបចំផែនការប៉ុនប៉ងធ្វើរដ្ឋប្រហារបរាជ័យក្នុងឆ្នាំ ២០១៦។ 

ការិយាល័យអគ្គរដ្ឋអាជ្ញានៅក្នុងទីក្រុង Kayseriនៃខេត្ត Anatolian ភាគកណ្តាល បាននិយាយថា ជនសង្ស័យចំនួន ៧០នាក់ ត្រូវបានឃាត់ខ្លួន នៅក្នុងការវាយឆ្មក់ក្នុងពេលដំណាលគ្នាដែលបានធ្វើឡើងនៅក្នុងទីក្រុង Kayseri, Istanbul, Adana និងទីក្រុង Mersin បន្ទាប់ពីប្រតិបត្តិការឃ្លាំមើលរយៈពេល ៦ខែ។

ក្រុមសរុបចំនួន ១៤៤ ក្រុម រួមទាំងបុគ្គលិក និងអង្គភាពប្រតិបត្តិការពិសេសចំនួន ៦៧៦នាក់ បានចូលរួមក្នុងការវាយប្រហារនេះ។ មន្ត្រីបានបញ្ជាក់ថា នគរបាលបានរឹបអូសឧបករណ៍ថតសំឡេង និងកាមេរ៉ាដែលលាក់ទុក អាវុធគ្មានអាជ្ញាប័ណ្ណ គ្រាប់រំសេវ រួមទាំងឯកសារអង្គការ និងសម្ភារៈឌីជីថលផ្សេងៗផងដែរ។

នៅក្នុងការស៊ើបអង្កេតដាច់ដោយឡែកមួយដែលដឹកនាំដោយការិយាល័យអគ្គរដ្ឋអាជ្ញាទីក្រុងអ៊ីស្តង់ប៊ុល ជនសង្ស័យចំនួន ១៨ នាក់បន្ថែមទៀត រួមទាំងមន្ត្រីសាធារណៈចំនួន ១៦នាក់ ត្រូវបានឃុំខ្លួន នៅក្នុងប្រតិបត្តិការមួយដែលធ្វើឡើងនៅទូទាំងខេត្តចំនួន ៨។

ការិយាល័យនេះ បានបន្ថែមថា ជនសង្ស័យពីរនាក់ ត្រូវបានចោទប្រកាន់ថា បានកាន់តួនាទីជាន់ខ្ពស់ក្នុងអង្គការនេះ ខណៈដែលអ្នកដែលត្រូវបានឃាត់ខ្លួនផ្សេងទៀត គឺជាមន្ត្រីសាធារណៈដែលត្រូវបានចោទប្រកាន់ថា ជាសមាជិក។

រដ្ឋាភិបាលទួរគីបានស្តីបន្ទោសលោក Fethullah Gulen ដែលជាបព្វជិតទួរគីម្នាក់ដែលរស់នៅនិរទេសខ្លួននៅសហរដ្ឋអាមេរិក ចាប់ពីឆ្នាំ ១៩៩៩ រហូតដល់លោកទទួលមរណភាពនៅឆ្នាំ ២០២៤ ចំពោះការរៀបចំផែនការធ្វើរដ្ឋប្រហារដែលបរាជ័យក្នុងខែកក្កដា ឆ្នាំ ២០១៦ ដែលបានបណ្តាលឲ្យមនុស្សយ៉ាងហោចណាស់ ២៥០នាក់ ស្លាប់ និងប្រហែល ២.២០០នាក់ផ្សេងទៀត រងរបួស។ ទួរគីបានចាត់ទុកចលនា Gulen ជាអង្គការភេរវកម្ម៕