អនុប្រធានាធិបតីហ្វីលីពីន លោកស្រី Sara Duterte បានប្រកាសនៅថ្ងៃពុធ (១៨ កុម្ភៈ) នេះថា លោកស្រីនឹងឈរឈ្មោះជាប្រធានាធិបតី នៅក្នុងការបោះឆ្នោតឆ្នាំ២០២៨ ខាងមុខនេះ។ លោកស្រី Duterte បាននិយាយថា លោកស្រីកំពុងដាក់ «ជីវិត កម្លាំង និងអនាគត» របស់ខ្លួន ទៅក្នុងការបម្រើប្រទេសជាតិ។ ការស្ទង់មតិឯករាជ្យបានចាត់ទុកលោកស្រី ថាជាបេក្ខភាពដ៏រឹងមាំមួយរូបនៅក្នុងការប្រណាំងប្រជែងឆ្នាំ២០២៨។

យោងតាមរដ្ឋធម្មនុញ្ញហ្វីលីពីន ប្រធានាធិបតីត្រូវបានកំណត់ចំពោះអាណត្តិរយៈពេល ៦ឆ្នាំតែមួយអាណត្តិប៉ុណ្ណោះ ដែលមានន័យថា ប្រធានាធិបតីបច្ចុប្បន្ន លោក Ferdinand Marcos Jr ដែលជាគូប្រជែងនយោបាយ មិនអាចឈរឈ្មោះបោះឆ្នោតឡើងវិញបានទេ។

លោកស្រី Duterte គឺជាកូនស្រីរបស់លោកអតីតប្រធានាធិបតី Rodrigo Duterte ដែលបច្ចុប្បន្នកំពុងត្រូវបានឃុំខ្លួននៅទីក្រុងឡាអេ ជុំវិញសំណុំរឿងឃាតកម្ម ដែលជាប់ទាក់ទងនឹងសង្គ្រាមដ៏បង្ហូរឈាមរបស់លោកប្រឆាំងនឹងគ្រឿងញៀន ក្នុងអំឡុងពេលកាន់តំណែងប្រធានាធិបតី៕