រដ្ឋមន្ត្រីក្រសួងបង្រួបបង្រួមរបស់កូរ៉េខាងត្បូង លោក Chung Dong-young បាននិយាយនៅថ្ងៃពុធ (១៨ កុម្ភៈ) នេះថា ជនស៊ីវិល ៣នាក់ បានបង្ហោះយានដ្រូនចូលទៅកាន់ដែនអាកាសកូរ៉េខាងជើង ចំនួន ៤លើក ចាប់តាំងពីលោកប្រធានាធិបតីកូរ៉េខាងត្បូង Lee Jae Myung ឡើងកាន់តំណែងកាលពីឆ្នាំមុនមក ដែលបានធ្វើឱ្យប៉ះពាល់ដល់ទំនាក់ទំនងអន្តរកូរ៉េ។

លោក Chung បាននិយាយថា ជនទាំងបីនោះ បាបង្ហោះដ្រូនរវាងខែកញ្ញា ឆ្នាំ២០២៥ និងខែមករា ឆ្នាំ២០២៦នេះ ដោយសម្ងាងដល់ការស៊ើបអង្កេតជាបន្តបន្ទាប់របស់នគរបាល និងយោធា។ លោកបន្តថា យានដ្រូនបានធ្លាក់ចំនួនពីរលើកនៅកូរ៉េខាងជើង ស្របតាមការអះអាងរបស់ទីក្រុងព្យុងយ៉ាងពិតមែន។

លោក Chung បានបន្ថែមថា នៅក្នុងការប៉ុនប៉ងពីរលើកផ្សេងទៀត យានដ្រូនបានវិលត្រឡប់ទៅកាន់តំបន់ Paju ដែលជាតំបន់តាំងទីលំនៅតាមព្រំដែននៅកូរ៉េខាងត្បូង បន្ទាប់ពីបានហោះហើរពីលើទីក្រុង Kaesong ដែលជាទីក្រុងមួយរបស់កូរ៉េខាងជើង។ លោកសង្កត់ធ្ងន់ថា អាជ្ញាធរកូរ៉េខាងត្បូងកំពុងស៊ើបអង្កេតជនស៊ីវិលទាំង ៣នាក់នេះ ដោយសង្ស័យថា បានរំលោភលើច្បាប់សុវត្ថិភាពអាកាសចរណ៍ និងរំលោភច្បាប់ព្រហ្មទណ្ឌ។

កូរ៉េខាងជើងបានប្រតិកម្មដោយកំហឹងទាក់ទងនឹងឧប្បត្តិហេតុនេះ ដោយនិយាយកាលពីខែមុនថា យានដ្រូនមកពីកូរ៉េខាងត្បូង បានចូលក្នុងដែនអាកាសរបស់ខ្លួន បន្ទាប់ពីការឈ្លានពានមួយផ្សេងទៀតក្នុងខែកញ្ញា។ លោកស្រី Kim Yo Jong ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន បានជំរុញឱ្យទីក្រុងសេអ៊ូល ស៊ើបអង្កេតឧប្បត្តិហេតុនេះ ដោយព្រមានថា ការញុះញង់អាចនាំឱ្យមាន «ស្ថានភាពដ៏គួរឱ្យភ័យខ្លាច»៕