មន្ត្រីជាន់ខ្ពស់អាមេរិកម្នាក់ កាលពីថ្ងៃអង្គារ (ទី១៧ ខែកុម្ភៈ ឆ្នាំ២០២៦) បានបង្ហាញពីអ្វីដែលលោកនិយាយថា ជាព័ត៌មានលម្អិតថ្មី អំពីបំផ្ទុះសាកល្បងនុយក្លេអ៊ែរក្រោមដី ដែលត្រូវបានសង្ស័យថា ត្រូវបានធ្វើឡើងដោយប្រទេសចិន នៅក្នុងខែមិថុនា ឆ្នាំ២០២០។

ជំនួយការរដ្ឋមន្ត្រីការបរទេសអាមេរិក លោក Christopher Yeaw បានប្រាប់ព្រឹត្តិការណ៍មួយ នៅឯវិទ្យាស្ថាន Hudson Institute ក្នុងទីក្រុងវ៉ាស៊ីនតោន សហរដ្ឋអាមេរិកថា ស្ថានីយ៍តាមដានរញ្ជួយដីដាច់ស្រយាលមួយ នៅក្នុងប្រទេសកាហ្សាក់ស្ថាន បានកត់ត្រា «ការផ្ទុះ» កម្រិត ២,៧៥រ៉ិចទ័រ ដែលមានទីតាំងស្ថិតនៅចម្ងាយ ៧២០គីឡូម៉ែត្រ នៅឯតាំងធ្វើតេស្តសាកល្បង Lop Nor នៅភាគខាងលិចនៃប្រទេសចិន កាលពីថ្ងៃទី២២ ខែមិថុនា ឆ្នាំ២០២០។

លោក Yeaw ដែលជាអតីតអ្នកវិភាគចារកម្ម និងមន្ត្រីការពារជាតិ បានប្រាប់ថា៖ «ខ្ញុំបានពិនិត្យមើលទិន្នន័យបន្ថែម ចាប់តាំងពីពេលនោះមក។ មានលទ្ធភាពតិចតួចណាស់ដែលខ្ញុំនឹងនិយាយថា វាគឺមិនមានអ្វីផ្សេងឡើយ តែជាការផ្ទុះ ពោលគឺជាការផ្ទុះតែម្ដងប៉ុណ្ណោះ»។ លោកបានបន្ថែមថា ទិន្នន័យទាំងនោះមិនស៊ីសង្វាក់គ្នាជាមួយនឹងការផ្ទុះអណ្ដូងរ៉ែនោះឡើយ។

លោក Yeaw ដែលមានសញ្ញាបត្របណ្ឌិតផ្នែកវិស្វកម្មនុយក្លេអ៊ែរ បានបន្ថែមទៀតថា៖ «វាក៏មិនស៊ីសង្វាក់គ្នាទាំងស្រុងជាមួយនឹងរញ្ជួយដីដែរ។ វាគឺជាអ្វីដែលអ្នករំពឹងទុកថា ជាការសាកល្បងគ្រាប់បែកនុយក្លេអ៊ែរ»។

យ៉ាងណាក្ដី អង្គការសន្ធិសញ្ញាហាមឃាត់ការធ្វើតេស្តគ្រប់ជ្រុងជ្រោយ (CTBTO) ដែលទទួលបន្ទុកស្វែងរកការបំផ្ទុះសាកល្បងនុយក្លេអ៊ែរ បានឲ្យដឹងថា ទិន្នន័យគឺមានមិនគ្រប់គ្រាន់នោះទេ ដើម្បីបញ្ជាក់ពីការចោទប្រកាន់របស់លោក Yeaw ថា ត្រឹមត្រូវ។ ស្ថានទូតចិនប្រចាំទីក្រុងវ៉ាស៊ីនតោន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងការលើកឡើងនេះ៕