ស៊ីហ្គេម៖ បន្ទាប់ពីបញ្ចប់កិច្ចប្រជុំនាយបេសកកម្មស៊ីហ្គេម ២០២១ និងទស្សនកិច្ចកន្លែងប្រកួតនានានៅទីក្រុងហាណូយ និងកន្លែងក្បែរខាង ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាមានប្រសាសន៍ថា ឯកឧត្តមបានកត់សម្គាល់ជាច្រើនចំណុច ក្នុងនោះទីលានប្រកួតមួយចំនួនមិនទាន់រួចរាល់នៅឡើយទេ តែវៀតណាមបញ្ជាក់ថានឹងធ្វើឱ្យទាន់ពេល ខណៈការប្រកួតនៅសល់ជាងពីរខែទៀត។
ឯកឧត្ដមអគ្គលេខាធិការបន្ថែមថា អ្វីដែលសំខាន់គឺកម្ពុជាស្មើឱ្យវៀតណាមទទួល និងជួយដល់កម្ពុជាដោយសារតែយើងបញ្ជូនប្រតិភូទ្រង់ទ្រាយធំទៅចូលរួម និងសុំឱ្យផ្ដល់ការហ្វឹកហាត់ដល់កីឡាមួយចំនួន។ ឯកឧត្ដមបន្តថា ជាការឆ្លើយតបវៀតណាមទទួលយកសំណូមពរទាំងនេះ។ អគ្គលេខាធិការគណៈកម្មាធិការជាតិរៀបចំស៊ីហ្គេម ២០២៣ លើកឡើងដែរថា ប្រទេសដែលបានចូលរួមកិច្ចប្រជុំនាយបេសកកម្មស៊ីហ្គេម ២០២១ នេះបានសម្តែងនូវការអបអរសាទរដល់ដំណើរការរៀបចំស៊ីហ្គេម ២០២៣ នៅកម្ពុជា ហើយសប្បាយចិត្តនឹងចូលរួមកិច្ចប្រជុំក្រុមប្រឹក្សាកីឡាអាស៊ី អាគ្នេយ៍ជាលើកដំបូងនៅកម្ពុជា ដែលនឹងប្រព្រឹត្តិទៅនៅខេត្តសៀមរាប។
សូមជម្រាបជូនថា ការចូលរួមប្រជុំលើកនេះ ក្រៅពីទទួលបាននូវព័ត៌មាន និងវឌ្ឍនភាពចុងក្រោយនៃដំណើរការប្រកួតស៊ីហ្គេមនៅវៀតណាម សម្រាប់សម្រួលដល់ការធ្វើដំណើរ និងការចូលរួមរបស់ប្រតិភូ និងអត្តពលិកកម្ពុជា ក៏ជាឱកាសល្អសម្រាប់បំពេញបន្ថែមបទពិសោធន៍ ក្នុងការដឹកនាំគ្រប់គ្រងព្រឹត្តិការណ៍ស៊ីហ្គេមដែលកម្ពុជាត្រៀមធ្វើម្ចាស់ផ្ទះបន្តវេននាឆ្នាំ២០២៣ ផងដែរ។ អត្តពលិកជាង ៧០០០នាក់មកពី ១១ប្រទេសនឹងចូលរួមការប្រកួតស៊ីហ្គេម ២០២១ លើកមកធ្វើនៅឆ្នាំ២០២២ ពីថ្ងៃទី១២ ដល់ថ្ងៃទី២៣ ខែឧសភា៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
