កាលពីថ្ងៃអង្គារម្សិលមិញ កងកម្លាំងប្រដាប់អាវុធកាណាដា បានស៊ូទ្រាំនឹងអាកាសធាតុត្រជាក់ខ្លាំង ពេលដែលពួកគេធ្វើសមយុទ្ធហ្វឹកហាត់នៅតំបន់អាកទិក កាត់ទឹកកកក្រាស់ៗ ជាការត្រៀមខ្លួនសម្រាប់សមយុទ្ធជ្រមុជទឹកត្រជាក់ ។

យោងតាមការអះអាងរបស់ទីភ្នាក់ងារព័ត៌មានរ៉យទ័រ បានឲ្យដឹងថា សីតុណ្ហភាពត្រជាក់ បានធ្លាក់ចុះរហូតដល់ -៥៨អង្សាសេ ពេលដែលទាហានចូលរួមសមយុទ្ធ Operation Nanook គឺជាសមយុទ្ធប្រចាំឆ្នាំបង្ហាញសមត្ថភាពរបស់កាណាដា ក្នុងការប្រតិបត្តិការ និងការពារដែនដីអាកទិករបស់ខ្លួន ។

សមយុទ្ធនេះ ត្រូវបានធ្វើឡើងជាមួយសហគមន៍ជនជាតិភាគតិចក្នុងតំបន់ និងដៃគូដែនដី ដោយរួមបញ្ចូលសមត្ថភាពយោធាជាមួយចំណេះដឹងប្រពៃណីដែលចាំបាច់សម្រាប់ការរស់រានក្នុងស្ថានភាពត្រជាក់ខ្លាំងបែបនេះ នៅក្នុងតំបន់ ។

សមយុទ្ធ Operation Nanook ឆ្នាំនេះដែរ បានលាតត្រដាងស្ថានភាពនៃចំណាប់អារម្មណ៍ភូមិសាស្រ្តនយោបាយកើនឡើងនៅតំបន់អាកទិក បន្ទាប់ពីសេចក្តីអត្ថាធិប្បាយរបស់ប្រធានាធិបតីសហរដ្ឋអាមេរិកលោក Donald Trump ពាក់ព័ន្ធនឹងការគ្រប់គ្រងកោះ Greenland ៕