ប្រធានាធិបតីតួកគី លោក Recep Tayyip Erdogan បាននិយាយកាលពីថ្ងៃអង្គារ (ទី១៧ ខែកុម្ភៈ ឆ្នាំ២០២៦) ថា ការទទួលស្គាល់របស់អ៊ីស្រាអែល ចំពោះសាធារណរដ្ឋបំបែកខ្លួន Somaliland នឹងមិនផ្តល់ផលប្រយោជន៍ដល់ដែនដី Somaliland ឬតំបន់នេះនោះទេ។

កាលពីខែធ្នូឆ្នាំមុន លោក Erdogan បាននិយាយថា ការសម្រេចរបស់អ៊ីស្រាអែល ក្នុងការទទួលស្គាល់ជាផ្លូវការនូវដែនដី Somaliland ជាតំបន់ភាគខាងជើងដែលបានប្រកាសខ្លួនឯងថា ជាដែនដីឯករាជ្យនៅឆ្នាំ១៩៩១ គឺខុសច្បាប់ និងមិនអាចទទួលយកបាន ហើយលោកបានចោទប្រកាន់អ៊ីស្រាអែលថា កំពុងព្យាយាមធ្វើឲ្យតំបន់ញកអហ្វ្រិក (Horn of Africa) មិនមានស្ថិរភាព។

ក្នុងអំឡុងពេលទស្សនកិច្ចនៅទីក្រុង Addis Ababa ប្រទេសអេត្យូពី អមដោយការបន្ថែមថា ទួរគីមិនចង់ឃើញជម្លោះថ្មីនៅក្នុងតំបន់នោះ លោក Erdogan បានប្រាប់សន្និសីទសារព័ត៌មានថា៖ «ខ្ញុំចង់គូសបញ្ជាក់ជាពិសេស អំពីជំហររបស់យើងក្នុងការផ្ដល់តម្លៃដល់អធិបតេយ្យភាព និងបូរណភាពទឹកដីរបស់រដ្ឋនានា នៅតំបន់ដែលប្រទេសអេត្យូពីស្ថិតនៅក្នុងនោះ»។

លោកបានបន្ថែមថា៖ «យើងជឿថា ប្រទេសក្នុងតំបន់ត្រូវស្វែងរកដំណោះស្រាយ ចំពោះបញ្ហានៃតំបន់ និងសម្រាប់តំបន់ញកអាហ្វ្រិក ដើម្បីកុំឲ្យក្លាយជាទីលានប្រកួតប្រជែង សម្រាប់កងកម្លាំងបរទេស។ ក្នុងន័យនេះ ខ្ញុំចង់សង្កត់ធ្ងន់ថា ការទទួលស្គាល់របស់អ៊ីស្រាអែល ចំពោះដែនដី Somaliland មិនផ្តល់ផលប្រយោជន៍ដល់ Somaliland ឬតំបន់ញកអាហ្វ្រិកនោះទេ»។

ប្រទេសសូម៉ាលីបានកាត់ផ្តាច់ទំនាក់ទំនងទាំងអស់ជាមួយអេមីរ៉ាតអារ៉ាប់រួម ដោយចោទប្រកាន់ថា ប្រទេសនេះមានឥទ្ធិពលលើការទទួលស្គាល់ដែនដី Somaliland ដោយអ៊ីស្រាអែល។ ចាប់តាំងពីពេលនោះមក ទីក្រុង Mogadishu បានចុះហត្ថលេខាលើកិច្ចព្រមព្រៀងការពារជាតិជាមួយកាតា ខណៈដែលទួរគីបានបញ្ជូនយន្តហោះចម្បាំងទៅកាន់មូលដ្ឋានរបស់ខ្លួននៅទីនោះ ដើម្បីបង្ហាញកម្លាំង៕