លោក Park Chang-seon ធ្លាប់ជានិស្សិតកំពូលមួយរូបនៅកូរ៉េខាងត្បូងដែលមានក្តីស្រមៃចង់ក្លាយជាប្រធានាធិបតី ។ ប៉ុន្តែជីវិតរបស់លោកបានប្រែក្រឡះ ក្នុងឆ្នាំ ១៩៧៤ ពេលដែលឪពុករបស់គាត់ គឺលោក Park Gi-rae ត្រូវបានចាប់ខ្លួនពីបទចោទប្រកាន់ធ្វើសកម្មភាពប្រឆាំងរដ្ឋ ហើយត្រូវបានកាត់ទោសប្រហារជីវិតនៅរយៈពេល ១ឆ្នាំក្រោយមក ។

លោក Park និយាយថា វាប្រៀបបាននឹងពិភពលោកក្រឡាប់ចាក់ ។ មុនពេលការចាប់ខ្លួនឪពុករបស់លោក លោកគឺជានិស្សិតកំពូលម្នាក់ ឈ្នះការប្រកួតប្រជែងសុន្ទរកថាថ្នាក់ជាតិ ហើយនិងបានឡើង ទូរទស្សន៍ KBS ប៉ុន្តែក្រោយការចាប់ខ្លួនឪពុករបស់លោក លោកបានក្លាយជាកូនប្រុសចារកម្ម និងជាកូនប្រុសរបស់កុម្មុយនិស្ត ។

ស្រមោលអន្ទោលតាមប្រាណគ្រួសាររបស់លោក អំឡុងការគ្រប់គ្រងបែបផ្តាច់ការរបស់លោកអតីតប្រធានាធិបតី Park Chung-hee ។

ចាប់តាំងពីថ្នាក់មធ្យមសិក្សារហូតមក លោក Park Chang-seon និយាយថា លោកបានរងការបំពានឥតឈប់ឈរពីគ្រូបង្រៀន និងឪពុកម្តាយផ្សេងទៀត ។ ពេលទៅសួរសុខទុក្ខឪពុករបស់លោកនៅពន្ធនាគារ Seodaemun ធ្វើឲ្យលោកពោពេញដោយការភ័យខ្លាច ហើយរូបលោកបង្ខំចិត្តរង់ចាំអស់រយៈពេលជាច្រើនម៉ោង ក្រោមអាកាសធាតុត្រជាក់ខ្លាំង ។

លោក Park បានរៀបរាប់ថា អស់រយៈពេល ៩ឆ្នាំ រាល់ការទៅសួរសុខទុក្ខ ប្រៀបបាននឹងការចូលរួមពិធីបុណ្យសព ។ ពួកយើងពុំដឹងនោះទេថាតើ វាគឺជាពេលចុងក្រោយឬយ៉ាងណា ដែលពួកយើងអាចជួបគាត់ ពីព្រោះថា ពួកយើងពុំបានដឹងនោះទេថាតើគាត់នឹងត្រូវស្លាប់នៅពេលណានោះ ។

សូមបញ្ជាក់ថា រដ្ឋអាជ្ញាកំពុងស្វែងរកការកាត់ទោសប្រហារជីវិតចំពោះលោកអតីតប្រធានាធិបតី Yoon Suk Yeol ពីបទចោទប្រកាន់ពីបទបះបោរជុំវិញការប្រកាសច្បាប់អាជ្ញាសឹករបស់លោកកាលពីខែធ្នូ ឆ្នាំ២០២៤ ដែលបានធ្វើឲ្យប្រទេសធ្លាក់ចូលទៅក្នុងភាពចលាចលនយោបាយអស់រយៈពេលជាច្រើនខែ ៕