សិស្សមធ្យមសិក្សា៖ ការប្រកួតកីឡាសិស្សមធ្យមសិក្សាឆ្នាំ២០២១-២០២២ លើវិញ្ញាសាកីឡាបាល់ទាត់, បាល់ទះ, បាល់បោះ, អត្តពលកម្ម និងកីឡាប៉េតង់ត្រូវបានបិទបញ្ចប់ដោយជោគហើយកាលពីថ្ងៃទី២០ ខែមីនា ឆ្នាំ២០២២ នៅវិទ្យាល័យកំពង់ធំ។
លោក ចាន់ តារា អភិបាលរងខេត្តកំពង់ធំបានជំរុញសិស្សានុសិស្សទាំងអស់ ឲ្យនាំគ្នាលេងកីឡាដើម្បីសុខភាពល្អមានទំនាក់ទំនងមានមេត្រីភាព និងមានសាមគ្គីភាពព្រមទាំងដើម្បីជៀសឲ្យផុតពីគ្រឿងញៀន។ កីឡាត្រូវលេងទៅតាមលក្ខណៈបច្ចេកទេស សីលធម៌ យុត្តិធម៌ និងប្រកបដោយឆន្ទៈមុតមាំ ហើយចេះគោរពដៃគូប្រកួតរបស់ខ្លួន ព្រោះការប្រកួតត្រូវគោរពតាមបទបញ្ជាផ្ទៃក្នុង ធ្វើការួបរួមគ្នាសាមគ្គីគ្នាឈ្នះដោយកិត្តិយស ចាញ់ដោយកិត្តិយស ហើយក្នុងនាមជាយុវជនម្នាក់ៗត្រូវមានជំនាញកីឡាមួយប្រភេទយ៉ាងតិចប្រចាំជីវិត។ លោក ឃឹម សេង ប្រធានការិយាល័យកីឡានៃមន្ទីរអប់រំ យុវជន និងកីឡាខេត្តកំពង់ធំបញ្ជាក់ថា លើកនេះការប្រកួតជ្រើសរើសជើងឯកប្រចាំខេត្តដែលមានកីឡាករសរុបចំនួន ៥៨៧នាក់ ស្រី ៣០០នាក់ ក្នុងនោះកីឡាបាល់ទាត់មាន ១៤ក្រុម កីឡាករបុរស ១២៦នាក់ និងស្រី ១២៦នាក់, កីឡាបាល់ទះមាន ១៥ក្រុម កីឡាករបុរស ៩៥នាក់ និងស្រី ៨៤នាក់, កីឡាបាល់បោះមាន ៤ក្រុម កីឡាករបុរស ១២នាក់ និងស្រី ៣៦នាក់, កីឡាអត្តពលកម្មមាន ១៤ក្រុម កីឡាករបុរស ៤២នាក់ និងស្រី ៤២នាក់ និងកីឡាប៉េតង់មាន ៦ក្រុម កីឡាករបុរស ១២នាក់ និងស្រី ១២នាក់។
លទ្ធផលបាល់បោះនារីលេខ១ បានទៅលើក្រុងស្ទឹងសែន, បាល់បោះបុរសបានទៅលើក្រុងស្ទឹងសែន, បាល់ទះនារីបានទៅលើស្រុកសន្ទុក, បាល់ទះបុរសបានទៅលើស្រុកស្ទោង, បាល់ទាត់នារីបានទៅលើក្រុងស្ទឹងសែន និងបាល់ទាត់បុរសបានទៅលើស្រុកតាំងគោក ដោយឡែកកីឡាប៉េតង់ វិញ្ញាសាវាយទោលនារីលេខ១ បានទៅលើវិទ្យាល័យកំពង់ធំក្រុងស្ទឹងសែន, វាយទោលបុរសបានទៅលើវិទ្យាល័យកំពង់ធំក្រុងស្ទឹងសែន, ៣នាក់ទល់នឹង ៣នាក់នារីបានទៅលើវិទ្យាល័យកំពង់ធំក្រុងស្ទឹងសែន និង ៣នាក់ទល់នឹង ៣នាក់បុរសបានទៅលើវិទ្យាល័យកំពង់ធំក្រុងស្ទឹងសែន៕
អត្ថបទ៖ កំពង់ធំ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
