អ្នកគ្រូហ្កាហ្សា Hadeel Jamal Zoarob បានប្រែក្លាយកន្លែងគាត់ជួលនៅទីក្រុង Arish របស់ប្រទេសអេហ្ស៊ីប ទៅជាមជ្ឈមណ្ឌលសិក្សាដោយឥតគិតថ្លៃសម្រាប់ក្មេងជម្លៀសខ្លួនរាប់រយនាក់ ដើម្បីជួយពួកគេទទួលបានការសិក្សាតាមអនឡាញ ក្រោយរត់គេចចេញពីសង្រ្គាមនៅតំបន់ហ្កាហ្សា ។

អ្នកស្រី Zoarob ដែលជាគ្រូគណិតវិទ្យា និងមានកូន ៤នាក់ បានចាកចេញពីតំបន់ហ្កាហ្សាកាលពីថ្ងៃទី ២៣ ខែមេសា ឆ្នាំ ២០២៤ ក្រោយការប្រយុទ្ធគ្នាអស់រយៈពេលជាច្រើនខែដែលអ្នកស្រីនិយាយថា វាបានធ្វើឲ្យខូចខាតផ្ទះរបស់គាត់យ៉ាងធ្ងន់ធ្ងរ ។

អ្នកគ្រូវ័យ ៣៤ឆ្នាំរូបនេះ បានធ្វើដំណើរទៅកាន់ប្រទេសអេហ្ស៊ីបជាមួយប្តីរបស់គាត់ គឺជាជាងភ្លើងកាន់លិខិតឆ្លងដែនអេហ្ស៊ីប និងកូនៗរបស់ពួកគេ តាមច្រកព្រំដែន Rafah ។ អ្នកស្រីនិយាយថា ឪពុករបស់គាត់ បងប្អូនប្រុសស្រីរបស់គាត់ បន្តរស់នៅក្នុងតំបន់ហ្កាហ្សា ។

ក្រោយពេលមកដល់ទីក្រុង Arish អ្នកស្រី Zoarob ដែលព្រួយបារម្ភពីកូនៗរបស់គាត់បាត់បង់ការសិក្សាអស់រយៈពេលជាច្រើនខែនោះ បានចាប់ផ្តើមបង្រៀនពួកគេនៅផ្ទះ ប៉ុន្តែក្រោយមក ក្មេងៗជម្លៀសខ្លួនរបស់គ្រួសារប៉ាឡេស្ទីនផ្សេងទៀត បានចាប់ផ្តើមចូលរៀនដូចគ្នា ។

ស្របពេលដែលចំនួនសិស្សកើនឡើង អ្នកស្រី Zoarob បានជួលកន្លែងទំនេរនៅជិតនោះ និងធ្វើវាទៅជាមជ្ឈមណ្ឌលសិក្សាដែលបច្ចុប្បន្នមានសិស្សជម្លៀសខ្លួនប្រហែល ២០០នាក់ ។ មជ្ឈមណ្ឌលគ្រប់គ្រងដោយអ្នកស្ម័គ្រចិត្តមួយនេះ ជួយក្មេងៗបន្តរៀនតាមកម្មវិធីសិក្សាប៉ាឡេស្ទីន ដែលភាគច្រើននៃពួកគេ ត្រូវរៀនតាមអនឡាញ ។

ថ្នាក់រៀនផ្តោតសំខាន់លើមុខវិជ្ជាស្នូលចំនួន ៤គឺ គណិតវិទ្យា វិទ្យាសាស្រ្ត ភាសាអារ៉ាប់ និងភាសាអង់គ្លេស ហើយផ្តល់ការសិក្សាឥតគិតថ្លៃដល់គ្រួសារដែលកូនៗរបស់ពួកគេ ពុំបានចូលរៀសអស់រយៈពេលជាច្រើនខែមកហើយ ដោយសារសង្រ្គាមនៅតំបន់ហ្កាហ្សា ៕