បាល់ទះ៖ ព្រឹត្តិការណ៍បាល់ទះ ៤នាក់ទល់ ៤នាក់ Ganzberg Special Volleyball League 2022 បានរៀបចំពិធីចាប់ឆ្នោតប្រកួតរួចហើយដោយមានបេក្ខភាព ១៣ក្រុមចូលរួម ខណៈការប្រកួតនឹងចាប់ផ្ដើមនាថ្ងៃទី២៥ ខែមីនា ឆ្នាំ២០២២ ខាងមុខនៅកីឡដ្ឋានព្រីនស៍។
ថ្លែងក្នុងពិធីចាប់ឆ្នោតការប្រកួតកាលពីចុងសប្ដាហ៍កន្លងទៅ លោក ទែន ឡន ប្រធានផែនអនុគណៈកម្មការបច្ចេកទេសការប្រកួតនេះបានឲ្យដឹងថា ក្រុមចូលរួមប្រកួតមាន ១៣ក្រុមដែលត្រូវប្រើរូបមន្ដប្រកួតវិលជុំ ហើយក្រុមមានពិន្ទុខ្ពស់ជាងគេ ៤ក្រុមនឹងត្រូវឡើងវគ្គខ្វែង ដើម្បីបន្ដប្រកួតស្វែងរកបេក្ខភាពវគ្គផ្ដាច់ព្រ័ត្រ និងក្រុមជើងឯកតែម្ដង។ ពានរង្វាន់នេះរៀបចំការប្រកួតរៀងរាល់ថ្ងៃព្រហស្បតិ៍ និងថ្ងៃសុក្រចាប់ពីថ្ងៃទី២៥ ដល់ថ្ងៃទី១៩ ខែសីហា ឆ្នាំ២០២២ ខណៈបេក្ខភាពចូលរួមគឺមានក្រុមកងពលតូចអន្តរាគមន៍លេខ៩, Vong Plus, យុវជនស្រុកល្វាឯម, សមាគមកីឡាបាល់ទះវិសាខា, ខេត្តកំពង់ស្ពឺ, ក្រុម Sport KPC, ស្នងការនគរបាលខេត្តព្រៃវែង, កងពលធំអន្តរាគមន៍លេខ៣, ស្នងការដ្ឋាននគរបាលខេត្តតាកែវ, នាយកដ្ឋានលិខិតឆ្លងដែន, ក្រសួងមហាផ្ទៃ, រដ្ឋបាលរាជធានីភ្នំពេញ និងក្រុមបាល់ទះ P.S Concrete។ លោក ប៉េង សុវណ្ណណូ ប្រធានប្រតិបត្តិនៃពានរង្វាន់ដដែល បានថ្លែងអំណរគុណដល់ក្រុមទាំង ១៣ ដែលបានដាក់ពាក្យចូលរួមប្រកួតប្រជែង ដើម្បីទទួលបានបទពិសោធន៍ និងបច្ចេកទេសថ្មីៗសម្រាប់ក្រុមរៀងៗខ្លួន។
លោកសម្លឹងឃើញថា ក្រុមទាំងអស់សុទ្ធតែមានសមត្ថភាព និងមានឆន្ទៈប្រយុទ្ធដ៏អង់អាចដូចៗគ្នា មុនការប្រកួតមកដល់។ ព្រឹត្តិការណ៍បាល់ទះ ៤ស្មើនេះដែរសម្រាប់ក្រុមឈ្នះជើងឯកនឹងទទួលបានពានមួយអមថវិកា ២០លានរៀល ហើយក្រុមជើងឯករងនឹងទទួលបានថវិកា ៨លានរៀល រីឯលេខ៣ ទទួលបានថវិកា ៤លានរៀល។ ជាមួយគ្នានោះដែរក៏មានការដាក់ពិន្ទុប្រគល់ពានឯកត្តជនជូនដល់កីឡាករឆ្នើម,កីឡាករវាយប្រយុទ្ធល្អជាងគេ, កីឡាករលើកបាល់បានល្អជាងគេ, កីឡាករវាយសេវាល្អជាងគេ, កីឡាករធ្វើរនាំងល្អជាងគេ និងក្រុមដែលប្រកួតយុត្តិធម៌ល្អជាងគេ អមដោយពានតូចម្នាក់១ និងថវិកា ៨សែនរៀល។ សម្រាប់កម្មវិធីប្រកួតបើកឆាកនារសៀលថ្ងៃទី១៥ ខែមីនាចុងក្រោយសប្ដាហ៍នេះ គឺមានក្រុមរដ្ឋបាលរាជធានីភ្នំពេញ ត្រូវជួបក្រុមកងពលធំអន្តរាគមន៍លេខ៣ និងក្រុមបាល់ទះវិសាខាត្រូវជួបក្រុមក្រសួងមហាផ្ទៃ។ រីឯនៅថ្ងៃទី២៦ ខែមីនាវិញមាន ២គូដូចគ្នាគឺក្រុមបាល់ទះ P.S Concrete ជួបក្រុមស្នងការដ្ឋាននគរបាលខេត្តព្រៃវែង និងក្រុមកងពលតូចអន្តរាគមន៍លេខ៩ ជួបក្រុមកីឡាបាល់ទះ Sport KPC៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
