ទីភ្នាក់ងារសារព័ត៌មានរដ្ឋរុស្ស៊ី បានរាយការណ៍ថា ប្រធានាធិបតីរុស្ស៊ី លោក Vladimir Putin បានជួបពិភាក្សាជាមួយរដ្ឋមន្ត្រីការបរទេសគុយបា លោក Bruno Rodriguez កាលពីថ្ងៃពុធ (១៨ កុម្ភៈ) នៅវិមានក្រឹមឡាំង ហើយនៅក្នុងជំនួបនោះ មេដឹកនាំរុស្ស៊ីរូបនេះនិយាយថា ការរឹតត្បិតថ្មីដែលដាក់លើប្រទេសកោះគ្រប់គ្រងតាមបែបកុម្មុយនិស្តមួយនេះគឺ «មិនអាចទទួលយកបានឡើយ»។

អ្នកការទូតជាន់ខ្ពស់រុស្ស៊ីមួយរូបបាននិយាយកាលពីសប្តាហ៍មុនថា ទីក្រុងមូស្គូនឹងផ្តល់ជំនួយដល់ទីក្រុងឡាហាវ៉ាន រួមទាំងជំនួយសម្ភារៈ ដើម្បីជួយទប់ទល់នឹងកិច្ចប្រឹងប្រែងរបស់សហរដ្ឋអាមេរិក ក្នុងការរាំងខ្ទប់ប្រេងមិនឱ្យចូលប្រទេសកោះមួយនេះ។ យោងតាមទីភ្នាក់ងារសារព័ត៌មាន TASS លោក Putin បានប្រាប់លោក Rodriguez ថា៖ ឥឡូវនេះជារយៈពេលពិសេសមួយ គឺទណ្ឌកម្មថ្មី ហើយដូចដែលដឹងស្រាប់ហើយចំពោះរឿងនេះ គឺរុស្ស៊ីមិនទទួលយកអ្វីដូចនេះបានជាដាច់ខាត។

ទីភ្នាក់ងារសារព័ត៌មាន TASS បានរាយការណ៍ថា ប្រមុខវិមានក្រឹមឡាំងរូបនេះ បាននិយាយថា ទំនាក់ទំនងរវាងរុស្ស៊ី និងគុយបា កំពុងអភិវឌ្ឍ «លើផ្លូវវិជ្ជមាន»។ ចំណែករដ្ឋមន្ត្រីការបរទេសរុស្ស៊ី លោក Sergei Lavrov វិញ បានប្រាប់សមភាគីគុយបារបស់លោកនៅក្នុងកិច្ចប្រជុំដាច់ដោយឡែកមួយកាលពីថ្ងៃពុធថា ទីក្រុងមូស្គូកំពុងជំរុញសហរដ្ឋអាមេរិក កុំឱ្យបិទខ្ទប់ផ្លូវទាំងស្រុងលើកងទ័ពជើងទឹកគុយបា ហើយកំពុងជំរុញឱ្យមានការចរចាជំនួសវិញ។

យ៉ាងណាមិញ លោក Dmitry Peskov អ្នកនាំពាក្យរបស់លោក Putin ត្រូវបានដកស្រង់សម្តីដោយទីភ្នាក់ងារសារព័ត៌មាន TASS កាលពីថ្ងៃពុធថា ទីក្រុងមូស្គូ មិនបានពិភាក្សាអំពីបញ្ហាគុយបាជាមួយទីក្រុងវ៉ាស៊ីនតោននោះឡើយ៕