ព្រឹទ្ធសមាជិកសហរដ្ឋអាមេរិក មកពីគណបក្សប្រជាធិបតេយ្យ ដែលទៅទស្សនកិច្ចនៅអ៊ុយក្រែន និងប្រទេសជិតខាង កាលពីថ្ងៃពុធ (១៨ កុម្ភៈ) បានសន្យាថា នឹងវិលត្រឡប់ទៅកាន់ទីក្រុងវ៉ាស៊ីនតោនវិញ និងជំរុញឱ្យមានទណ្ឌកម្មផ្នែកថាមពលថ្មីដ៏តឹងរ៉ឹង និងច្បាប់ផ្សេងៗទៀត ដើម្បីដាក់សម្ពាធលើរុស្ស៊ី ឱ្យបញ្ចប់សង្រ្គាមរបស់ខ្លួនប្រឆាំងនឹងអ៊ុយក្រែន ក្នុងសញ្ញាមួយដែលបង្ហាញថា ត្រឹមតែកិច្ចចរចាគឺមិនគ្រប់គ្រាន់ក្នុងការបញ្ចប់ជម្លោះដ៏បង្ហូរឈាមមួយនេះឡើយ។

ថ្លែងពីអ៊ុយក្រែនក្នុងបទសម្ភាសន៍ជាមួយអ្នកយកព័ត៌មានកាលពីថ្ងៃពុធ ព្រឹទ្ធសមាជិកអាមេរិក លោកស្រី Jeanne Shaheen មកពីរដ្ឋ New Hampshire និងព្រឹទ្ធសមាជិកគណបក្សប្រជាធិបតេយ្យ ៣រូបផ្សេងទៀត បាននិយាយថា៖ ពួកគេសង្ឃឹមថានឹងមើលឃើញកិច្ចខិតខំប្រឹងប្រែងកាន់តែខ្លាំងឡើង និងការងារជាក់ស្ដែងមួយចំនួននៅពេលត្រលប់ទៅទីក្រុងវ៉ាស៊ីនតោនវិញ ដើម្បីដាក់សម្ពាធលើលោកប្រធានាធិបតីរុស្ស៊ី Vladimir Putin។

កិច្ចចរចាសន្តិភាពរយៈពេល ២ថ្ងៃនៅទីក្រុងហ្សឺណែវ រវាងអ៊ុយក្រែន និងរុស្ស៊ី សម្របសម្រួលដោយសហរដ្ឋអាមេរិក បានបញ្ចប់នៅថ្ងៃពុធសប្ដាហ៍នេះ ដោយពុំមានការទម្លាយភាពទាល់ច្រកធំដុំណាមួយឡើយ ខណៈសង្គ្រាមយ៉ាងខ្លាំងក្លារបស់រុស្ស៊ីលើអ៊ុយក្រែន ជិតដល់ខួប ៤ឆ្នាំរបស់ខ្លួនទៅហើយ។ ប្រធានាធិបតីអ៊ុយក្រែន Volodymyr Zelenskyy បាននិយាយថា លោកមិនពេញចិត្តនឹងលទ្ធផលនេះទេ ទោះបីជារដ្ឋបាលរបស់លោកប្រធានាធិបតីអាមេរិក Donald Trump បានរាយការណ៍ពី «វឌ្ឍនភាពប្រកបដោយអត្ថន័យ» មួយចំនួនក៏ដោយ។

អ៊ុយក្រែន បានប្រឈមនឹងសម្ពាធយ៉ាងជាប់លាប់ពីលោក Trump ឱ្យយល់ព្រមលើកិច្ចព្រមព្រៀងមួយ ដែលអាចមានន័យថាជាការធ្វើសម្បទានដ៏ឈឺចាប់ ខណៈកងកម្លាំងរុស្ស៊ីបន្តវាយប្រហារបណ្តាញអគ្គិសនីរបស់អ៊ុយក្រែន និងបន្តវាយរុលទៅមុខយឺតៗនៅលើសមរភូមិ។ សមាជិកសភាអាមេរិកជាច្រើនរូប រួមទាំងសមាជិកមកពីបក្សសាធារណរដ្ឋមួយចំនួនរបស់លោក Trump ផ្ទាល់ ក៏ដូចជាសមាជិកបក្សប្រជាធិបតេយ្យ បាននិយាយថា ទីក្រុងគីវ មិនគួរប្រឈមមុខនឹងសម្ពាធខ្លាំងពេកនោះទេ៕