នៅក្នុងបទសម្ភាសន៍មួយដែលចេញផ្សាយជាសាធារណៈកាលពីថ្ងៃពុធ (១៨ កុម្ភៈ) រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយថា ការវាយប្រហារថ្មីណាមួយរបស់សហរដ្ឋអាមេរិក លើអ៊ីរ៉ង់ នឹងមានផលវិបាកធ្ងន់ធ្ងរ ហើយព្រមានថា ជំហាននេះគឺជាការប្រលែងលេងជាមួយភ្លើង និងបានអំពាវនាវឱ្យមានការអត់ធ្មត់ស្វែងរកដំណោះស្រាយមួយ ដើម្បីឱ្យអ៊ីរ៉ង់ អាចបន្តទៅមុខលើកម្មវិធីនុយក្លេអ៊ែរដោយសន្តិវិធីរបស់ខ្លួនបាន។

បទសម្ភាសន៍របស់លោក Lavrov ជាមួយទូរទស្សន៍ Al-Arabiya របស់អារ៉ាប៊ីសាអ៊ូឌីតនេះ ត្រូវបានចាក់ផ្សាយ រយៈពេលមួយថ្ងៃប៉ុណ្ណោះបន្ទាប់ពីអ្នកចរចាអាមេរិក និងអ៊ីរ៉ង់ បានធ្វើកិច្ចពិភាក្សាដោយប្រយោលនៅទីក្រុងហ្សឺណែវ ដើម្បីទប់ស្កាត់វិបត្តិថ្មីមួយរវាងទីក្រុងវ៉ាស៊ីនតោន និងទីក្រុងតេអេរ៉ង់។

ក្នុងបទសម្ភាសន៍ដែលក៏បានបង្ហោះលើគេហទំព័ររបស់ក្រសួងកាបរទេសរុស្ស៊ីផងដែរនោះ លោក Lavrov លើកឡើងថា៖ «ផលវិបាកក្នុងរឿងនេះគឺមិនល្អទេ។ មានការវាយប្រហាររួចទៅហើយនៅអ៊ីរ៉ង់លើទីតាំងនុយក្លេអ៊ែរ ក្រោមការគ្រប់គ្រងរបស់ទីភ្នាក់ងារថាមពលអាតូមិកអន្តរជាតិ។ ពីអ្វីដែលរុស្ស៊ីអាចវិនិច្ឆ័យបាន គឺមានហានិភ័យពិតប្រាកដនៃឧប្បត្តិហេតុនុយក្លេអ៊ែរ»។

លោកបន្តថា៖ «រុស្ស៊ីកំពុងតាមដានដោយប្រុងប្រយ័ត្ននូវប្រតិកម្មក្នុងតំបន់មជ្ឈិមបូព៌ា ពីបណ្តាប្រទេសអារ៉ាប់ រាជាធិបតេយ្យឈូងសមុទ្រ។ ពុំមាននរណាម្នាក់ចង់បានកំណើនភាពតានតឹងនេះទេ ព្រោះគ្រប់គ្នាយល់ថា រឿងនេះគឺជាការប្រលែងលេងជាមួយភ្លើង»។

ការព្រមានពីទីក្រុងមូស្គូ បានកើតឡើងស្របពេលដែលកិច្ចចរចានុយក្លេអ៊ែររវាងទីក្រុងវ៉ាស៊ីនតោន និងទីក្រុងតេអេរ៉ង់ ពុំទាន់បង្កើតបានផ្លែផ្កាធំដុំណាមួយឡើយ។ សហរដ្ឋអាមេរិក ចង់ឱ្យអ៊ីរ៉ង់ បោះបង់ចោលកម្មវិធីនុយក្លេអ៊ែររបស់ខ្លួន ប៉ុន្តែអ៊ីរ៉ង់ បានច្រានចោលយ៉ាងដាច់អហង្ការ និងបដិសេធថា ខ្លួនមិនកំពុងព្យាយាមអភិវឌ្ឍអាវុធអាតូមិកអ្វីនោះទេ៕