មន្ត្រីអ៊ុយក្រែននឹងធ្វើពហិការក្នុងការចូលរួមប្រកួតកីឡាប៉ារ៉ាឡាំពិករដូវរងា នេះបើយោងតាមការលើកឡើងរបស់ទីក្រុងគីវកាលពីថ្ងៃពុធ ទី១៨ ខែកុម្ភៈ បន្ទាប់ពីគណៈកម្មាធិការប៉ារ៉ាឡាំពិកអន្តរជាតិបានអនុញ្ញាតឱ្យអត្តពលិករុស្ស៊ីចូលប្រកួតប្រជែងក្រោមទង់ជាតិរបស់ពួកគេ។

អ៊ុយក្រែន ក៏បានជំរុញឱ្យប្រទេសដទៃទៀតបញ្ចៀសពិធីបើកការប្រកួតនៅទីក្រុង Verona ប្រទេសអ៊ីតាលី ថ្ងៃទី៦ ខែមីនា ជាផ្នែកមួយនៃការប្រឈមមុខដាក់គ្នាកាន់តែខ្លាំងឡើងរវាងទីក្រុងគីវ និងសហព័ន្ធកីឡាអន្តរជាតិ បួនឆ្នាំចាប់តាំងពីការឈ្លានពានរបស់រុស្ស៊ី។ ជនជាតិរុស្ស៊ី៦នាក់ និងជនជាតិបេឡារុស៤នាក់នឹងត្រូវបានអនុញ្ញាតឱ្យចូលរួមក្រោមទង់ជាតិផ្ទាល់ខ្លួនរបស់ពួកគេនៅឯកីឡាប៉ារ៉ាឡាំពិក Milan-Cortina នេះបើយោងតាមស្ថាប័នគ្រប់គ្រងការប្រកួត បានបញ្ជាក់ កាលពីថ្ងៃអង្គារ។

ប្រទេសរុស្ស៊ី ភាគច្រើនត្រូវបានហាមឃាត់មិនឱ្យចូលរួមកីឡាអន្តរជាតិចាប់តាំងពីទីក្រុងមូស្គូ បានឈ្លានពានអ៊ុយក្រែន។ ការសម្រេចចិត្តរបស់គណៈកម្មាធិការប៉ារ៉ាឡាំពិកអន្តរជាតិ(IPC) បានបង្កឱ្យមានកំហឹងនៅក្នុងប្រទេសអ៊ុយក្រែន។ រដ្ឋមន្ត្រីកីឡាអ៊ុយក្រែន លោក Matviy Bidny បានហៅការសម្រេចចិត្តនេះថា «គួរឱ្យស្អប់ខ្ពើម» ហើយបានចោទរុស្ស៊ី និងបេឡារុស ថាបានប្រែក្លាយ «កីឡាទៅជាឧបករណ៍នៃសង្គ្រាម កុហក និងការមិនគោរព»។

លោកបាននិយាយបន្ថែមនៅលើបណ្តាញផ្សព្វផ្សាយសង្គមថា «មន្ត្រីសាធារណៈអ៊ុយក្រែននឹងមិនចូលរួមការប្រកួតកីឡាប៉ារ៉ាឡាំពិកទេ។ យើងនឹងមិនមានវត្តមាននៅក្នុងពិធីបើកឡើយ»។ «យើងនឹងមិនចូលរួមក្នុងព្រឹត្តិការណ៍ប៉ារ៉ាឡាំពិកផ្លូវការផ្សេងទៀតទេ»។ រដ្ឋមន្ត្រីការបរទេសអ៊ុយក្រែន លោក Andriy Sybiga បាននិយាយថា លោកបានណែនាំឯកអគ្គរដ្ឋទូតរបស់ទីក្រុងគីវ ជំរុញឱ្យប្រទេសដទៃទៀតគេចវេះពីពិធីបើក ផងដែរ។