កាសែត Wall Street Journal បានរាយការណ៍ដោយដកស្រង់សម្តីមន្ត្រីអាមេរិកបីនាក់ថា សហរដ្ឋអាមេរិកកំពុងរៀបចំការដកកងទ័ពជិត ១.០០០នាក់ចេញពីអង្គភាពយោធារបស់ខ្លួនដែលនៅសល់ក្នុងប្រទេសស៊ីរី។

កាលពីសប្តាហ៍មុន យោធាអាមេរិកបានបញ្ជាក់ថា ខ្លួននឹងដកកងទ័ពចេញពីមូលដ្ឋាន al-Tanf មានទីតាំងនៅភាគខាងត្បូងប្រទេសស៊ីរី ជិតព្រំដែនជាមួយប្រទេសអ៊ីរ៉ាក់ និងហ្ស៊កដានី។ មូលដ្ឋាននេះ បានបម្រើជាមជ្ឈមណ្ឌលដ៏សំខាន់នៃប្រតិបត្តិការសម្រាប់ក្រុមចម្រុះសកលប្រឆាំងក្រុមអាយស៊ីស(ISIS) ដែលនៅពេលនោះ បានគ្រប់គ្រងតំបន់ធំៗនៅប្រទេសស៊ីរី និងអ៊ីរ៉ាក់រហូតដល់មានការបាត់បង់ធ្ងន់ធ្ងរនៅឆ្នាំ ២០១៧។ ទីបញ្ជាការកណ្តាលសហរដ្ឋអាមេរិក បាននិយាយថា «ការចាកចេញតាមលំដាប់លំដោយ» កាលពីសប្តាហ៍មុនគឺ «ជាផ្នែកមួយនៃការផ្លាស់ប្តូរដោយចេតនា និងផ្អែកលើលក្ខខណ្ឌ»។

ទន្ទឹមនឹងនេះ កាសែត Wall Street Journal បានបង្ហាញថា ការដកកងទ័ពអាមេរិកនៅក្នុងប្រទេសស៊ីរីនឹងធ្វើឡើងក្នុងរយៈពេលពីរខែខាងមុខ។ រដ្ឋបាលរបស់ប្រធានាធិបតី លោក Donald Trump បានថ្លឹងថ្លែងពីការដកកងទ័ពទាំងស្រុងចាប់តាំងពីយ៉ាងហោចណាស់ខែមករា។

យោងតាមមន្ត្រីដែលត្រូវបានដកស្រង់សម្តីដោយកាសែត Wall Street Journal បានឲ្យដឹងថា ការសម្រេចចិត្តដកកងទ័ពចេញពីប្រទេសស៊ីរី មិនជាប់ទាក់ទងទៅនឹងការបង្កើនកងទ័ពជើងទឹក និងកងទ័ពអាកាសអាមេរិកនាពេលបច្ចុប្បន្ននៅកន្លែងផ្សេងទៀតនៅតំបន់មជ្ឈិមបូព៌ានោះទេ ខណៈភាពតានតឹងកំពុងកើនឡើងជាមួយប្រទេសអ៊ីរ៉ង់។ ក្នុងរយៈពេលប៉ុន្មានសប្តាហ៍ថ្មីៗនេះ រដ្ឋបាលលោក Trump បានគំរាមចាត់វិធានការយោធាប្រឆាំងប្រទេសអ៊ីរ៉ង់ ដើម្បីឆ្លើយតបទៅនឹងការបង្ក្រាបរបស់ប្រទេសនេះលើក្រុមបាតុករប្រឆាំងរដ្ឋាភិបាល និងការខកចិត្តចំពោះការចរចានុយក្លេអ៊ែរដែលកំពុងបន្ត។