ប្រភពចំនួនពីរបានប្រាប់សារព័ត៌មានរ៉យទ័រថា អាល្លឺម៉ង់ កំពុងពិចារណាបញ្ជាទិញយន្តហោះចម្បាំង F-35 បន្ថែមទៀតដែលផលិតនៅសហរដ្ឋអាមេរិក ក្នុងជំហានមួយដែលនឹងធ្វើឱ្យការពឹងផ្អែករបស់ទីក្រុងប៊ែរឡាំង លើបច្ចេកវិទ្យាយោធាអាមេរិក កាន់តែមានភាពខ្លាំងក្លាឡើង ខណៈកម្មវិធីយន្តហោះចម្បាំងជំនាន់ក្រោយរួមគ្នាជាមួយបារាំង កំពុងរអាក់រអួល។

ប្រភពនិយាយថា ទីក្រុងប៊ែរឡាំង កំពុងស្ថិតក្នុងការចរចា ដែលអាចនាំឱ្យមានការទិញយន្តហោះចម្បាំងប្រភេទនេះបន្ថែមលើសពីចំនួន ៣៥ គ្រឿង។ គួរឱ្យដឹងថា អាល្លឺម៉ង់បានទិញយន្តហោះ F-35 ចំនួន ៣៥ គ្រឿងក្នុងឆ្នាំ២០២២ ដែលនឹងចាប់ផ្តើមដឹកជញ្ជូននៅចុងឆ្នាំ២០២៦នេះ។

លទ្ធភាពនៃការទិញយន្តហោះចម្បាំងបំបាំងកាយរបស់ក្រុមហ៊ុន Lockheed Martin ថ្មីៗជាច្រើនគ្រឿងបន្ថែមទៀត ក្នុងតម្លៃជាង ៨០ លានដុល្លារក្នុង ១គ្រឿង អាចនឹងកើតឡើងបន្ទាប់ពីសម្ពាធពីទីក្រុងវ៉ាស៊ីនតោន លើសម្ព័ន្ធមិត្តអឺរ៉ុប ឱ្យបង្កើនការចំណាយវិស័យការពារជាតិ។ ប្រសិនបើការទិញយន្តហោះ F-35 ថ្មីៗទាំងអស់ និងការបញ្ជាទិញដែលមានស្រាប់ ក្លាយជាជំហានពិតប្រាកដ នោះអាល្លឺម៉ង់នឹងមានយន្តហោះ F-35 ប្រហែល ៨៥គ្រឿង។ ប៉ុន្តែប្រភពព្រមានថា លទ្ធផលនៅមិនទាន់ច្បាស់នោះទេ។

ដំណឹងបញ្ជាទិញយន្តហោះចម្បាំងអាមេរិកថែមទៀត បានកើតឡើងស្របពេលអាល្លឺម៉ង់ និងបារាំង កំពុងជាប់គាំងលើកម្មវិធីឆ្នាំ២០១៧ របស់ពួកគេ ឈ្មោះ ប្រព័ន្ធប្រយុទ្ធដែនអាកាសនាពេលអនាគត (ឬហៅថា FCAS) ដែលកំពុងជួបបញ្ហា និងមានតម្លៃដល់ទៅ ១០០ពាន់លានអឺរ៉ូ ក្នុងការសាងសង់យន្តហោះជំនាន់ក្រោយដើម្បីជំនួសយន្តហោះចម្បាំងរបស់បារាំង អាល្លឺម៉ង់ និងអេស្ប៉ាញ ចាប់ពីឆ្នាំ២០៤០។ ប៉ុន្តែនៅក្រោមសេណារីយ៉ូដែលមានបញ្ហាជាច្រើន អាល្លឺម៉ង់ និងបារាំង អាចនឹងត្រូវបោះបង់ចោលគម្រោងមួយនេះ៕