អធិការបតីអាល្លឺម៉ង់ Friedrich Merz បានសម្ដែងការគាំទ្រជាសាធារណៈលើការអំពាវនាវកាន់តែខ្លាំងឡើងនៅប្រទេសនេះ ក៏ដូចជានៅអឺរ៉ុបទាំងមូល ឱ្យមានចំណាត់ការគ្រប់គ្រងលើការចូលប្រើប្រាស់របស់កុមារលើវេទិកាបណ្ដាញសង្គម ដោយនិយាយថា លោកកាន់តែជឿជាក់ខ្លាំងឡើងអំពីតម្រូវការសម្រាប់ដែនកំណត់ជាកាតព្វកិច្ច ដោយសារមានភស្តុតាងនៃគ្រោះថ្នាក់ដែលបង្កឡើងដោយការរីករាលដាលនៃព័ត៌មានក្លែងក្លាយដោយចេតនា និងទម្រង់ផ្សេងទៀតនៃការបំភាន់តាមអ៊ីនធឺណិត។

ក្នុងសុន្ទរកថាមួយមុនសន្និសីទគណបក្សប្រចាំឆ្នាំ លោក Merz បានចោទសួរថា «តើគ្រប់គ្នាចង់អនុញ្ញាតឱ្យព័ត៌មានមិនពិតដែលបង្កើតឡើងដោយបញ្ញាសិប្បនិម្មិត ព័ត៌មានក្លែងក្លាយ និងការបំភ្លៃការពិតផ្សេងទៀត ត្រូវបានផ្សព្វផ្សាយតាមរយៈបណ្ដាញសង្គមមែនឬទេ?»។ ដោយជំរុញឱ្យចាត់វិធានការ លោក Merz បានសង្កត់ធ្ងន់ថា ក្មេងអាយុ ១៤ឆ្នាំ ចំណាយពេលជាមធ្យម ៥ម៉ោងកន្លះ ក្នុងមួយថ្ងៃ ដើម្បីលេងអ៊ីនធឺណិត។

បច្ចុប្បន្ន ប្រទេសកាន់តែច្រើនឡើងៗនៅអឺរ៉ុប រួមទាំងអេស្ប៉ាញ ក្រិក បារាំង និងចក្រភពអង់គ្លេសជាដើម កំពុងពិចារណាលើការហាមឃាត់ ឬការរឹតបន្តឹងលើបណ្ដាញសង្គមស្រដៀងគ្នានេះ ដោយធ្វើតាមគំរូរបស់អូស្ត្រាលី ដែលកាលពីឆ្នាំមុន បានក្លាយជាប្រទេសដំបូងគេនៅលើពិភពលោក ដែលបង្ខំឱ្យវេទិកានានាកាត់ផ្តាច់ការចូលប្រើប្រាស់សម្រាប់កុមារ។

ការគាំទ្ររបស់លោក Merz ចំពោះដែនកំណត់បណ្ដាញសង្គម ដោយមានការគាំទ្រពីបក្សទាំងពីរនៅក្នុងរដ្ឋាភិបាលចម្រុះអាល្លឺម៉ង់ផងដែរនោះ ធ្វើឱ្យមានលទ្ធភាពខ្ពស់ថា រដ្ឋាភិបាលសហព័ន្ធនឹងជំរុញឱ្យមានការរឹតបន្តឹង។ ប៉ុន្តែក្រោមប្រព័ន្ធសហព័ន្ធរបស់អាល្លឺម៉ង់ បទប្បញ្ញត្តិប្រព័ន្ធផ្សព្វផ្សាយគឺជាការទទួលខុសត្រូវកម្រិតរដ្ឋ ហើយរដ្ឋនានាត្រូវតែចរចាគ្នាដើម្បីព្រមព្រៀងលើច្បាប់ដែលស៊ីសង្វាក់គ្នាទូទាំងប្រទេស៕