លោក Bogdan Ivan រដ្ឋមន្ត្រីក្រសួងថាមពលបាននិយាយថា ព្រិលនិងភ្លៀងធ្លាក់ខ្លាំងនៅទូទាំងប្រទេសរ៉ូម៉ានី បានបណ្តាលឲ្យលំនៅឋានចំនួន ២០០.០០០ខ្នង គ្មានអគ្គិសនីប្រើប្រាស់កាលពីថ្ងៃពុធ ទី១៨ ខែកុម្ភៈ ដោយចរាចរណ៍ត្រូវបានបិទនៅលើផ្លូវហាយវ៉េនិងផ្លូវជាតិ ហើយរថភ្លើងរាប់សិបគ្រឿងត្រូវបានពន្យារពេល។

ការដឹកជញ្ជូនសាធារណៈនៅក្នុងរដ្ឋធានី Bucharest កំពុងទប់ទល់នឹងការលំបាកក្រោមព្រិលធ្លាក់កម្រាស់៤០សង់ទីម៉ែត្រ។ ដើមឈើបាក់រលំ បានបង្អាក់ចរាចរណ៍ផ្លូវគោក និងផ្លូវរថភ្លើង សាលារៀនបានបិទទ្វារនៅក្នុងទីក្រុងជាច្រើន ហើយរថយន្តគិលានសង្គ្រោះចំនួន១០គ្រឿងនៅក្នុងស្រុកចំនួន៦ត្រូវបានព្រិលធ្លាក់គ្របពីលើ នេះបើយោងតាមទីភ្នាក់ងារឆ្លើយតបបន្ទាន់ជាតិ។

លោក Ivan បានប្រាប់អ្នកសារព័ត៌មានថា «ក្នុងចំណោមលំនៅឋានចំនួន ២០០.០០០ខ្នងដែលរងផលប៉ះពាល់រហូតមកដល់ពេលនេះ ប្រហែល ៨៦.០០០ខ្នងត្រូវបានភ្ជាប់ចរន្តអគ្គិសនីឡើងវិញ ខណៈក្រុងចំនួន២៦៦បានរងផលប៉ះពាល់»។

លោកបាននិយាយបន្ថែមថា ការប្រើប្រាស់ថាមពលនៅប្រទេសរ៉ូម៉ានី ជាមធ្យម៧,៤ ជីហ្កាវ៉ាត់(GW) ដោយការផលិតថាមពលខ្យល់ និងវារីអគ្គិសនី លើស ត្រូវបាននាំចេញ។