កូរ៉េខាងជើងបាននិយាយនៅថ្ងៃព្រហស្បតិ៍ ១៩កុម្ភៈសប្ដាហ៍នេះថា មេដឹកនាំលោក Kim Jong Un បានរៀបចំពិធីបង្ហាញការដាក់ពង្រាយប្រព័ន្ធជើងទម្របាញ់អាវុធថ្មីចំនួន ៥០ គ្រឿងសម្រាប់មីស៊ីលរយៈចម្ងាយខ្លីមានសមត្ថភាពបំពាក់នុយក្លេអ៊ែរ ដែលគំរាមកំហែងដល់គូប្រជែងកូរ៉េខាងត្បូង ខណៈលោកបានបង្ហាញពីសមត្ថភាពយោធាដែលកំពុងពង្រីកខ្លួនរបស់លោកមុនសមាជបក្សកាន់អំណាចដ៏សំខាន់មួយ។

នៅក្នុងសេចក្តីថ្លែងការណ៍ដាច់ដោយឡែកមួយ ប្អូនស្រីរបស់លោក Kim ដែលជាមន្ត្រីគោលនយោបាយការបរទេសសំខាន់មួយរូប បានទទួលស្គាល់ការសូមអភ័យទោសរបស់រដ្ឋមន្ត្រីកូរ៉េខាងត្បូង ទាក់ទងនឹងការឈ្លានពានរបស់យានដ្រូនស៊ីវិល ប៉ុន្តែបាននិយាយថា កូរ៉េខាងជើងកំពុងពង្រឹងសន្តិសុខព្រំដែនប្រឆាំងនឹងកូរ៉េខាងត្បូង ដែលជាសត្រូវ របស់ខ្លួន ។

កូរ៉េខាងជើងបានផ្អាកការចរចា និងកិច្ចសហប្រតិបត្តិការស្ទើរតែទាំងអស់ជាមួយកូរ៉េខាងត្បូង ចាប់តាំងពីឆ្នាំ ២០១៩ នៅពេលដែលការទូតនុយក្លេអ៊ែររបស់លោក Kim ជាមួយប្រធានាធិបតីអាមេរិក Donald Trump បានបរាជ័យដោយសារទណ្ឌកម្មដឹកនាំដោយសហរដ្ឋអាមេរិក។

ទំនាក់ទំនងកាន់តែដុនដាបក្នុងប៉ុន្មានឆ្នាំថ្មីៗនេះ ខណៈលោក Kim បានបោះបង់ចោលគោលដៅយូរអង្វែងរបស់កូរ៉េខាងជើងក្នុងការបង្រួបបង្រួមដោយសន្តិវិធី និងបានប្រកាសពីប្រព័ន្ធ "រដ្ឋពីរ" ដែលមានអរិភាពនៅលើឧបទ្វីបកូរ៉េ ជាជំហរមួយដែលលោកអាចធ្វើឱ្យមានលក្ខណៈស្ថាប័នបន្ថែមទៀតនៅក្នុងរដ្ឋធម្មនុញ្ញរបស់គណបក្សពលករក្នុងអំឡុងពេលសមាជខាងមុខ។

រូបភាប្រព័ន្ធផ្សព្វផ្សាយរដ្ឋបានបង្ហាញជួររថយន្តបាញ់មីស៊ីលជាច្រើនគ្រឿងតម្រង់ជួរនៅជិតវិមានវប្បធម៌ ២៥ មេសា ដែលជាទីកន្លែងនៃសមាជបក្សក្នុងឆ្នាំ ២០១៦ និង ២០២១៕